August 21, 2017
You can use WP menu builder to build menus

وزیراعظم پاکستان کی بارسلونا میں دہشت گردانہ حملے کی مذمت

Aug 20, 2017

 وزیر اعظم شاہد خاقان عباسی اور اسپیکر قومی اسمبلی سردار ایاز صادق نے بارسلونا میں دہشت گردانہ حملے کی مذمت کرتے ہوئے اس میں ہونے والے قیمتی جانوں کے ضیاع پر انتہائی گہرے دکھ درد اور غم و رنج کا اظہار کیا ہے۔

وزیر اعظم ہاوس سے جمعے کو جاری ایک تعزیتی پیغام کے مطابق وزیر اعظم شاہد خاقان عباسی نے سپین کے شہر بارسلونا میں نہتے عوام پر دہشت گردانہ حملے کو انتہائی افسوس ناک قرار دیا اور کہا کہ ایسے حملے کر کے دہشت گرد عوام کے حوصلے پست کرنا چاہتے ہیں لیکن سپین کے عوام آزدی کے دفاع کی روشن تاریخ رکھتے ہیں لہذا ایسے بزدلانہ حملے ان کے حوصلے پست نہیں کر سکتے۔

دوسری جانب اسپیکر قومی اسمبلی ایاز صادق نے بھی بارسلونا میں دہشت گردانہ حملے کی مذمت کی ہے اور کہا ہے کہ ہم بحثیت قوم دہشت گردی کے خلاف جنگ لڑ رہے ہیں اور جانتے ہیں کہ دہشت گرد حملوں کے عوام پر کیا اثرات مرتب ہوتے ہیں۔ لہذا ضرورت اس امر کی ہے کہ عوام کو دہشت گردی کے خلاف یکجا کیا جائے اور ان کے حوصلے مضبوط کیے جائیں تاکہ انتہا پسندانہ سوچ کو تقویت نہ ملے جبکہ پاکستان نے دہشت گردی کو جڑ سے اکھاڑ پھنکنے کا عزم کر رکھا ہے۔

Read More

بارسلونا حملہ: مسلمانوں کے خلاف مظاہرہ، شہریوں نے ناکام بنا دیا

Aug 20, 2017

بس پریس۔کام۔ بارسلونا لا رمبلہ اور کامبریلز میں ہونے والے حملوں کے بعد مسلمانوں کے خلاف ہونے والے مظاہرے کو اہلیان بارسلونا نے ناکام بنا دیا۔ مختلف نیو نازی تنظیموں پر مشتمل اتحاد نے لا بوقیریا مارکیٹ کے سامنے مظاہرہ کرنے کا اعلان کیا تھا۔ جس پر ان تنظیموں کے بیسیوں اراکین مظاہرہ کی جگہ پر پہنچ گئے اور "سپین کرسچین ہے اور مسلمان نامنظور" کے نعرے بلند کرنے شروع کردیے۔ ان نعروں کے بلند  ہونے کے بعد سینکڑوں اہلیان بارسلونا نے انتہائی دائیں بازو کے ممبران کے ساتھ الجھنا شروع کردیا۔ اور فاشسٹ ہمارے محلے سے نکل جائیں، کے نعرے بلند کرنے شروع کر دیے۔ جس پر صوبائی پولیس نے مداخلت کرتے ہوئے مظاہرہ کو درہم برہم کر دیا۔ اہلیان بارسلونا کے اس ردعمل پر پودیموس پارٹی کے رہنما پابلو اگلیسیاس نے اپنے ٹویٹر پیغام پر فاشسٹوں کو روکنے پر اہلیان بارسلونا کا شکریہ ادا کیا ہے۔ف۔ٹویٹر پابلو اگلیسیاس 

Read More

امسال سپینش والدین 1212 یورو تعلیمی اخراجات کی مد میں خرچیں گے

Aug 20, 2017

بس پریس۔کام۔ صارفین کی انجمن کے جاری کردہ اعدادوشمار کے مطابق والدین اس سال تعلیمی اخراجات کی مد میں 3 سے 17 سالہ بچوں پر فی بچہ 1.212 یورو خرچیں گے۔ جس میں سے 841 یورو رجسٹریشن فیس کی مد میں خرچے جائیں گے۔ جبکہ پرائیویٹ تعلیمی اداروں میں تعلیم کی صورت میں یہ رقم 4.086 یورو تک جا پہنچے گی۔ انجمن کے مطابق والدین سالانہ بنیادوں پر قبل از سکول تعلیم پر 1.236 یورو۔ پرائمری سکول تعلیم پر 1.368۔ سیکنڈری سکول تعلیم پر 1.161 یورو اور گریجویشن تعلیم پر 1.073 یورو خرچتے ہیں۔ف۔جی وی اے

Read More

سپین: جولائی میں نوکری حاصل کرنے والے. 1/4 ملازم 1 ہفتہ بعد ہی نوکری سے فارغ

Aug 20, 2017

بس پریس۔کام۔ سپین کے نوکری فراہم کرنے کے سرکاری ادارے کے مطابق ماہ جولائی میں نوکری پانے والے ایک چوتھائی ملازمین کو ایک ہفتہ بعد ہی نوکری سے فارغ کر دیا گیا۔ ماہ جولائی میں 19 لاکھ افراد نے نوکریاں حاصل کی تھیں۔ جن میں سے 4 لاکھ افراد کو ایک ہفتہ بعد نوکری سے فارغ کر دیا گیا تھا۔ جبکہ 89 ہزار ملازمین 7 سے 15 دنوں میں نوکری سے فارغ کر دیا گیا۔ف۔ای پی 

Read More

ال کانار دھماکہ: کیا سپین ایک بڑی تباہی سے بچ گیا؟

Aug 20, 2017

بس پریس۔کام۔ صوبائی پولیس حکام کمبریلز میں ہلاک کیے جانے والے دہشت گردوں کے لا رمبلہ بارسلونا اور ال کانار  کے ایک گھر میں ہونے والے دھماکے کے درمیان تعلق کی تفتیش کر رہی ہے۔ ال کانار میں جمعرات کی صبح دھماکہ کے باعث گھر مکمل طور سے تباہ ہو گیا تھا۔ پولیس حکام کو اس گھر کے پچھواڑے میں گیس سلنڈروں کی ایک بھاری تعداد ملی ہے۔ جن کے بارے میں شبہہ ہے کہ، وہ کسی بڑے حملے میں استعمال کئے جانے تھے۔ ال کانار گھر میں ہونے والے دھماکے میں ایک شخص ہلاک جبکہ 6 زخمی ہوئے ہیں۔ جبکہ پولیس حکام کو ملبہ کی صفائی کے دوران ایک مزید لاش کے حصے ملے ہیں۔ جن کے بارے میں فرانزک تجزیہ کیا جا رہا ہے۔ بارسلونا سے 200 کلومیٹر فاصلہ پر واقع قصبہ کے اس گھر کو دہشت گردوں کے بیس کیمپ کا درجہ حاصل ہو سکتا ہے۔ وہیں 100 کے قریب گیس سلنڈروں کی موجودگی، ماہرین کو اس نکتہ پر سوچنے پر مجبور کر رہی ہے کہ ال کانار میں ہونے والی تباہی کے باعث، کیا سپین ایک بڑی تباہی سے بچ گیا ہے؟۔ف۔ موسوس

Read More

بارسلونا حملہ: ٹیکسی ڈرائیوروں نے مفت سروس فراہم کی

Aug 20, 2017

بس پریس۔کام۔ بارسلونا، لا رمبلہ پر ہونے والے وین حملہ سے شہر بھی میں متائثرین سے اظہار ہمدری کی لہر دوڑ گئی۔ شہری سیاحوں کو کھانا اور مفت رہائش فراہم کرتے رہے۔ وہیں، بارسلونا کے ٹیکسی سیکٹر نے متائثرین کے ورثاء کو مفت خدمات فراہم کیں۔ف۔کوارڈینیٹر25ایس

Read More

بارسلونا حملہ: کھاریاں کے امیر حسن سمیت متعدد پاکستانی زخمی۔ وزارت خارجہ لاعلم

Aug 20, 2017

بس پریس۔کام۔ بارسلونا حملہ میں جہاں 14 افراد جاں بحق ہوئے ہیں۔ وہیں 35 ممالک کے 126 شہری بھی زخمیوں کی فہرست میں شامل ہیں۔ پاکستانی ذرائع ابلاغ کی جانب سے زخمی پاکستانیوں میں سے صرف ایک زخمی کھاریاں کے امیر حسن کا نام سامنے آیا ہے۔ جب کہ دوسری طرف قونصلیٹ اور سفارت خانہ کے سوشل میڈیا اکائونٹس سے کسی بھی قسم کی کوئی معلومات فراہم نہیں کی جارہی۔ جس کی وجہ سے پاکستانی تارکین وطن کے اہل خاندان اذیت سے دوچار ہیں۔ وہیں پاکستانی وزارت خارجہ کے ترجمان نے اس حملہ میں کسی پاکستانی کے ہلاک یا زخمی ہونے کی خبر ذرائع ابلاغ کو دی ہے۔ جو کہ سفارتی عملہ اور وزارت خارجہ کی پاکستانی تارکین وطن سے روایتی دوری اور لاتعلقی کو ظاہر کرتی ہے۔ 

Read More

بارسلونا حملہ: ڈرائیور ابو یعقوب کی سرگرم تلاش جاری

Aug 20, 2017

بس پریس۔کام۔ بارسلونا رمبلہ پر ہونے والے حملہ میں وین ڈرائیور یونس ابو یعقوب کی سرگرم تلاش جاری ہے۔ ریپویع قصبہ کے مراکشی نژاد شہری ابو یعقوب کے علاوہ ریپویع کے امام مسجد عبدالباقی الساتی کے بارے میں شبہہ کیا جا رہا ہے کہ، وہ اس دہشت گرد گروہ کے مبینہ سربراہ تھے۔ عبدالباقی اکانار میں ہونے والے دھماکے میں ہلاک ہو چکا ہے۔ جبکہ ابو یعقوب ابھی بھی مفرور ہے۔ 45 سالہ عبدالباقی شدت پسند نظریات کا حامل اور 2012 میں جیل سے رہا ہوا تھا۔ پولیس حکام نے ہفتہ کے روز ریپویع میں واقع عبدالباقی کے گھر کی تلاشی لی تھی۔ پولیس حکام کے مطابق دہشت گرد گروہ 12 افراد پر مشتمل تھا۔ جن میں سے 5 افراد کو ہلاک کیا جا چکا ہے۔ جبکہ 4 افراد گرفتار ہیں۔ اور 2 سے 3 افراد کے بارے میں شبہہ ظاہر کیا جا رہا ہے کہ وہ غائب ہیں۔  

Read More

بارسلونا ہیروئن فروشوں سے 2 گھر چھڑوالیے گئے۔ شہری سراپا احتجاج

Aug 16, 2017

بس پریس۔کام۔ بارسلونا کے دل محلہ روال میں جاری عوامی احتجاج کے بعد منگل کے روز پولیس نے ہیروئن فروشوں کے زیر قبضہ دو مزید گھر خالی کروالئے ہیں۔ سانت ویسینس گلی میں واقع ان دونوں میں سے ایک فلیٹ پر قبضہ کے چند ہی لمحے بعد شہریوں کی جانب سے آگاہ کرنے پر مقامی پولیس نے فوری ردعمل ظاہر کرتے ہوئے، نشیئوں کو فلیٹ سے باہر دھکیل دیا۔ محلہ داروں کی جانب سے پاکستانی، مراکشی اور رومانوی منشیات فروشوں کے خلاف جاری احتجاج زور پکڑتا جا رہا ہے۔ جس کے باعث مقامی پولیس متحرک ہو گئی ہے۔ منگل کے روز ڈپٹی میئر بارسلونا جانیت سانز نے صوبائی وزارت داخلہ پر مزید اقدامات اٹھانے پر زور دیا ہے۔ ڈپٹی میئر کے مطابق منشیات فروشوں کے خلاف ایکشن صوبائی پولیس کا معاملہ ہے۔ اور صرف وہی اس طرح کے فلیٹوں میں داخل ہونے کی عدالت سے اجازت حاصل کر سکتی ہے۔ف۔جوردی کورتینا  

Read More

سپینش بینک، یورپی سینٹرل بینک کے 1.71 کھرب یورو کے مقروض

Aug 16, 2017

بس پریس۔کام۔ گذشتہ ایک سال میں سپینش بینکوں کے ذمہ یورپی سینٹرل بینک کے قرض میں ٪25 اضافہ ہو گیا ہے۔ سپینش بینک اس وقت یورپی بینک کے 1.71 کھرب یورو کے مقروض ہیں۔ ماریو داگی کی زیر سربراہی یورپی بینک کی جانب سے جاری کردہ کل قرضوں کی مقدار 7.75 کھرب یورو تک پہنچ چکی ہے۔ف۔ریوٹرس۔فرانسوئس لینوئر 

Read More

ایر برلن دیوالیہ: پروازوں کا شیڈول متائثر نہیں ہو گا

Aug 16, 2017

بس پریس۔کام۔ یورپین فضائی ادارے ایر برلن نے دیوالیہ ہونے کا اعلان کر دیا ہے۔ کمپنی کو یہ اعلان اپنی پارٹنر فضائی کمپنی اتحاد ایرویز کی جانب سے مزید سرمایہ فراہم کرنے سے صاف انکار کے بعد کرنا پڑا۔ ایر برلن کے فضائی آپریشن کو بحال رکھنے کیلئے جرمن حکومت نے فوری طور پر 15 کروڑ یورو قرض فراہم کیا ہے۔ ایر برلن 2008 سے مسلسل خسارہ میں جا رہی ہے۔ صرف 2012 میں کمپنی نے 68 لاکھ یورو کا منافع کمایا تھا۔ جبکہ گذشتہ سال کمپنی نے 78 کروڑ یورو خسارہ برداشت کیا۔ 2008 سے اب تک کمپنی کو 2.50 ارب یورو کا خسارہ ہو چکا ہے۔ کمپنی نے خسارہ پر قابو پانے کیلئے اپنے جہازوں کی تعداد کم کر کے انہیں 75 جہازوں اور 1200 ملازمین تک لے آنے کے علاوہ، اپنی ذیلی فضائی کمپنی نیکی کو 30 کروڑ یورو کے عوض اتحاد ایر ویز کو فروخت کیا تھا۔اس کمپنی کے مممکنہ متوقع خریداروں میں لفتھانسا ایرلائن بھی شامل ہے۔ف۔بیرینگیراس

Read More

سپین کا سب سے مہنگا گھر۔ قیمت 5.75 کروڑ یورو۔ کمرے صرف 8

Aug 16, 2017

بس پریس۔کام۔ ایدیالیستا ایجنسی نے الکودیا میں موجود سپین کے سب سے مہنگے گھر کو فروخت کیلئے پیش کر دیا ہے۔ 3.500 مربع میٹر پر تعمیر شدہ گھر میں صرف 8 کمرے ہیں۔ اور اس کی قیمت 5.75 کروڑ یورو بتائی جا رہی ہے۔ دیگر مہنگے ترین گھروں کی اکثریت مایورکا جزیرہ اور ماربیعا شہر میں بتائی جا رہی ہے۔ دوسرا سب سے مہنگا گھر ماربیعا میں موجود ہے۔ جس کی قیمت 2.70 کروڑ یورو ہے۔ تیسرے نمبر پر پوئیج پونیعنت میں 17 ویں صدی کا 3 ہزار مربع میٹر پر 10 کمروں پر مشتمل تعمیر شدہ گھر ہے۔ جس کی قیمت 2.65 کروڑ یورو ہے۔ ساتویں نمبر پر بارسلونا کے نواحی گائوں تیانا کا گھر ہے۔ جس کی قیمت 1.98 کروڑ یورو بیان کی جارہی ہے۔ف۔ایدیالیستا 

Read More

سپین: سرنج میں ہوا بھر کر لگادی۔ مریضہ جاں بحق- نرس گرفتار

Aug 16, 2017

بس پریس۔کام۔ سپینش محکمہ صحت نے بیعآتریز نامی نرس کو معطل کرتے ہوئے اس کی تنخواہ ضبط کرنے کا اعلان کیا ہے۔ 37 سالہ نرس پر ایک معمر مریضہ کو قتل کرنے میں ملوث ہونے کا الزام عائد کیا گیا ہے۔ شبہ ہے کہ، جیل میں قید نرس نے صحت کے حوالہ سے بہتری کی جانب گامزن مریضہ کو سرنج میں صرف ہوا بھر کر لگا دی تھی۔ جس کے باعث مریضہ جاں بحق ہو گئی۔ عدالتی حکم پر ثبوت اکٹھے کرنے کیلئے پولیس حکام نے نرس کے دفتر اور گھر کی تلاشی بھی لی ہے۔ وہیں محکمہ صحت نے گذشتہ چند سالوں میں اسی نرس کے زیر علاج 5 معمر مریضوں کے انتقال کرنے سے متعلق تحقیقات بھی شروع کر دی ہیں۔ف۔یورپ پریس

Read More

کیا سپینش وفاقی حکومت، کتلونیا کی صوبائی حیثیت ختم کر دے گی؟

Aug 16, 2017

بس پریس۔کام۔ کیا سپینش وفاقی حکومت آئین کے آرٹیکل 155 کو استعمال کرتے ہوئے، کتلونیا کی صوبائی حیثیت ختم کردے گی؟ جیسے جیسے یکم اکتوبر 2017 کی تاریخ قریب آ رہی ہے۔ ویسے ویسے سپینش قانونی ماہرین، اس ریفرنڈم اور کتلان آزادی کے عمل کو روکنے کیلئے مختلف قانونی نقاط پر بحث کر رہے ہیں۔ پاک فیڈریشن سپین کے جنرل سیکرٹری و سابق امیدوار قومی اسمبلی سپین راجہ بابر ناصر کے مطابق، آرٹیکل  155 کے تحت وفاقی حکومت، کسی بھی آتونامو علاقہ کی خصوصی حیثیت معطل کرسکتی ہے۔ راجہ بابر ناصر کے مطابق، یہ ایک بہت بڑا قدم ہو گا۔ اور وفاقی حکومت کے پاس ابھی بہت سے دیگر انتہائی مناسب اور بہترین ممکنہ حل موجود ہیں۔ جن کو استعمال کرتے ہوئے، وفاقی حکومت اس ریفرنڈم کا انعقاد روک سکتی ہے۔ وہیں حکمران پاپولر پارٹی کے قومی اسمبلی میں ترجمان رافاعیل ہیرناندو نے اس وقت آرٹیکل 155 کے نفاذ کو قانونی حوالہ سے نامناسب قرار دیا ہے۔ اور موجودہ سیاسی صورتحال میں اس آرٹیکل کے استعمال سے کسی بھی بہتری کو خارج الامکان قرار دیا ہے۔ف۔یورپ پریس 

Read More

پامپیو فابرا، سپین کی سب سے بہترین جامعہ قرار

Aug 16, 2017

بس پریس۔کام۔ دنیا کی بہترین 200 جامعات میں کسی بھی سپینش جامعہ کے شامل نہ ہونے کو ایک افسوس ناک خبر کے طور پر سپینش ذرائع ابلاغ میں پیش کیا گیا ہے۔ البتہ ہاورڈ، سٹینفورڈ اور کیمبرج جیسی دنیا کی تین بہترین جامعات کے ساتھ بارسلونا کی جامعہ پامپیوفابرا کو 239 واں، بارسلونا جامعہ کو 261 واں اور غرناطہ جامعہ کو 268 واں مقام حاصل ہوا ہے۔ یہ درجہ بندی طلباء کی تعداد، اساتذہ کی جانب سے نوبل انعام حاصل کرنا، تحقیق کاروں، اور تحقیقی مضامین کی اشاعت کی بنیاد پر کی جاتی ہے۔ دنیا کی سب سے بہتر جامعہ ہونے کا اعزاز گذشتہ 15 سالوں سے ہارورڈ جامعہ نے سنبھالا ہوا ہے۔ جبکہ یورپ کی سب سے بہترین جامعہ کا اعزاز سوئس فیڈرل انسٹیٹیوٹ آف ٹیکنالوجی زیورخ کو حاصل ہوا ہے۔ جو دنیا میں 20 ویں مقام پر فائز ہے۔ جس کے بعد کوپن ہیگن جامعہ ڈنمارک آتی ہے۔ جس کا دنیا میں 30 واں مقام ہے۔ 

Read More

بارسلونا: پاکستانی ہیروئن فروشوں کی فخریہ پیشکش، نشئیوں کیلئے محفوظ ٹھکانے

Aug 15, 2017

بس پریس۔کام۔ سپینش موقر جریدہ کی جاری کردہ رپورٹ کے مطابق، بارسلونا کی ٹائون کمیٹی سیوتات بیعا میں مقامی پولیس نے 60 کے قریب ایسے فلیٹوں کی نشاندہی کی ہے۔ جہاں پر ہیروئن فروش منظم گروہ، منشیات کے عادی افراد کو اپنی نگرانی میں رہائش فراہم کرتے ہیں۔ ان فلیٹوں کی اکثریت محلہ روال میں ہے۔ عمومی طور پر یہ خالی فلیٹ بینکوں یا غیر ملکی سرمایہ کار کمپنیوں کے ہوتے ہیں۔ جو اپنے نئے مالکان یا کرایہ داروں کے منتظر ہوتے ہیں۔ جنہیں منشیات فروش گروہ ڈھونڈ کر ان پر اپنا قبضہ جما لیتے ہیں۔ پولیس کے مطابق ان فلیٹوں کو منشیات چھپانے اور منشیات استعمال کرنے کیلئے استعمال کیا جاتا ہے۔ ایک حالیہ چھاپے میں پولیس کو ایسے ہی ایک فلیٹ سے بھنگ، چرس، ایکس تاسیس، کریک، ایم ڈی ایم اے، کوکین اور ہیروئن کی بھاری مقدار برآمد ہوئی ہے۔ انرجی کنٹرول نامی ایجنسی کی جانب سے 2014 سے اب تک ہیروئن کے 200 مختلف نمونوں کی جانچ پڑتال کے دوران، ہیروئن میں بھی شدید ملاوٹ کی نشاندہی ہوئی ہے۔ یہی وجہ ہے کہ بارسلونا میں صرف ایک وقت استعمال کی ہیروئن کی پڑیا صرف 10 یورو میں فروخت کی جا رہی ہے۔ اب منشیات فروشی کے کاروبار کو مزید پرسکون انداز میں چلانے کیلئے منشیات فروش گروہوں نے منشیات کے عادی افراد کو منشیات استعمال کرنے کیلئے محفوظ رہائش گاہوں کا اہتمام بھی کر کے دینا شروع کر دیا ہے۔ یہی وجہ ہے کہ محکمہ صحت کے حکام کے جاری کردہ اعدادوشمار کے مطابق بارسلونا میں ہیروئن کے استعمال کرنے والوں میں اضافہ کی نشاندہی نہیں ہو پائی۔ 2016 سے قبل یہ لوگ منشیات پارکوں یا سڑک کے کنارے استعمال کرتے تھے۔ جس کی بناء پر یہ لوگ محکمہ صحت اور پولیس کی نظروں میں آتے تھے۔ اب منشیات فروشوں نے اپنے صارفین کی سہولت کیلئے محفوظ ٹھکانوں کی فراہمی شروع کر دی ہے۔ جس کی وجہ سے محکمہ صحت کے پاس ان نئے نشیئوں کا ڈیٹا موجود نہیں ہے۔ اب تک منشیات فروش روال محلہ کی 10 اہم اور قدیم گلیوں میں اپنے ٹھکانے بنا چکے ہیں۔ ان فلیٹوں کے مکینوں کو ہیروئن سے پہنچنے والے نقصانات کو کم کرنے کیلئے سماجی تنظیموں کے رضا کار ان فلیٹوں میں داخل ہو کر، منشیات کے عادی افراد کو استعمال شدہ سرنجوں کے بدلے نئی سرنجوں کی فراہمی کے علاوہ ان فلیٹوں کو چھوڑ کر دوسری جگہ پر منتقل کرنے کی کوشش کرتے ہیں۔ کہ جہاں ان کے ہمسایوں سے جھگڑوں میں کمی آ سکے۔ اور ان کو منشیات سے چھٹکارا دلانے کیلئے نفسیاتی علاج فراہم کیا جاسکے۔ جب ہمسایوں کی بات کی جائے، تو ان گلیوں کے مکین اس صورتحال سے تنگ آ چکے ہیں۔ اور رات کے وقت گھریلو استعمال کے برتنوں کو چمچوں سے بطور احتجاج بجانا معمول بن چکا ہے۔ وہیں وہ اس نکتہ کو بھی اٹھاتے ہیں کہ، پولیس کو علم ہے کہ، ان فلیٹوں میں منشیات کے عادی افراد نے قبضہ جمایا ہوا ہے۔ تو وہ کیوں اندر داخل ہو کر ان تمام کو باہر نہیں نکال دیتی۔ پاک فیڈریشن سپین کے نوجوان سپینش وکیل توقیر طاہر کے مطابق آئین کے آرٹیکل 18.2 کے مطابق پولیس اس وقت تک کسی فلیٹ/گھر میں داخل نہیں ہو سکتی۔ جب تک کہ اس کے پاس عدالتی حکم نامہ موجود نہ ہو۔ وہیں صوبائی پولیس کے ایک سپاہی کے مطابق، مجسٹریٹ سے چھاپہ مارنے کی اجازت لینے کیلئے ہمیں بہت سے ثبوتوں کی ضرورت ہوتی ہے۔ جو کہ ایک آسان عمل نہیں ہے۔ اور منشیات فروش اس بات سے آگاہ ہیں۔ اور اس کا فائدہ بھی اٹھاتے ہیں۔ صوبہ کتلونیا میں ایسے منظم گروہ کام کر رہے ہیں۔ جو کہ ایسے خالی فلیٹوں کا کھوج لگاتے ہیں۔ اور ان کے تالوں کو تبدیل کرکے ان پر قبضہ جمانے کے بعد تبدیل شدہ تالوں کی چابیوں کو 2 سے 3 ہزار یورو کے عوض فروخت کر دیتے ہیں۔ پولیس کے مطابق ایسے فلیٹ منشیات فروش گروہ حاصل کر لیتے ہیں۔ جنہیں بعد ازاں منشیات کے عادی افراد کو منشیات استمال کرنے کیلئے فراہم کر دیا جاتا ہے۔ رپورٹ کے مطابق محلہ روال میں رومانوی، پاکستانی اور مراکشی النسل تارکین وطن پر مشتمل منشیات فروشوں کے چھوٹے مگر منظم گروہ سرگرمی سے مصروف عمل ہیں۔ ان گروہوں کے سربراہ ان قبضہ شدہ فلیٹوں میں رہائش پذیر نہیں ہوتے۔ البتہ وہ تمام صورتحال کا جائزہ لینے اور نیا مال بیچنے کیلئے ان فلیٹوں کا باقاعدگی سے دورہ کرتے ہیں۔ اور اپنے ملازمین جو کہ خود بھی منشیات کے عادی افراد ہوتے ہیں۔ کو منشیات کے ساتھ ساتھ، ہیروئن اور دیگر منشیات کے استعمال میں آسانی فراہم کرنے والی اشیاء کی فراہمی کو یقینی بناتے ہیں۔ امسال ماہ جنوری سے اب تک صوبائی پولیس ایسے 22 فلیٹوں پر چھاپے مار کر انہیں منشیات فروشوں کے قبضہ سے آزاد کرواچکی ہے۔ وہیں ٹائون کمیٹی سیوتات بیعا کی چیئرپرسن گالا پن کے اپنی فیس بک پر دیے بیان کے مطابق، وہ اس تمام صورتحال سے مکمل آگاہ ہیں۔ اور روال محلہ کے تمام علاقوں میں تو نہیں البتہ، بعض علاقوں میں ہیروئن کا کاروبار جاری ہے۔ اور پولیس گشت میں اضافہ کے ساتھ ساتھ، مخصوص طریقہ سے صفائی کیلئے مزید عملہ کی تعیناتی بھی کی گئی ہے۔ 

Read More

سپینش تعلیمی سال 2017/18 کیلئے وظائف۔ آخری تاریخ 17 اکتوبر

Aug 14, 2017

بس پریس۔کام۔ سپینش وزارت تعلیم نے تعلیمی سال 2017/18 کے دوران وظائف کے حصول کے خواہشمند طلباء سے درخواستیں طلب کرنے کے عمل کا آغاز کر دیا ہے۔ وہ طلباء جو کہ جامعات میں تعلیم حاصل نہ کر رہے ہوں۔ وہ 3 اکتوبر 2017 تک اور وہ طلباء جو جامعات میں تعلیم حاصل کرنا چاہ رہے ہوں۔ وہ 17 اکتوبر 2017 تک اپنی درخواستیں جمع کرواسکتے ہیں۔ تمام تعلیمی اخراجات کی ادائیگی کیلئے طلباء کا 6.50 پوائنٹس اور صرف داخلہ فیس کی ادائیگی کیلئے 5.50 پوائنٹس حاصل کرنا لازمی قرار دیا گیا ہے۔ف۔البارو آراگون 

Read More

سپین۔ اگست میں درجہ حرارت منفی درجہ پر

Aug 14, 2017

بس پریس۔ کام۔ سپین میں ماہ اگست میں ہی درجہ حرارت منفی درجہ میں گر گیا۔ محکمہ موسمیات کے مطابق زامورا ڈویژن کے گائوں روبلیدا سیروانتے میں درجہ حرارت منفی 1.9 درجہ ریکارڈ کیا گیا۔ یہ واحد گائوں نہیں ہے بلکہ اورینسے ڈویژن کے راندیین گائوں میں درجہ حرارت منفی 1.6 ریکارڈ کیا گیا۔ف۔اٹلس 

Read More

یورپین انڈوں کا بحران۔ سپینش انڈے صحتمند قرار

Aug 14, 2017

بس پریس۔کام۔ سپینش ایجنسی برائے نیوٹریشن کے مطابق سپینش مرغیوں کے انڈے صحت مند اور کسی بیماری سے پاک ہیں۔ ایجنسی کی جانب سے یہ اعلان یورپی سطح پر انڈوں کا بحران پیدا ہونے کے بعد سامنے آیا ہے۔ یورپ میں یہ بحران اس وقت سامنے آیا، جب جولائی میں بیلجئم کے انڈوں میں جانوروں کیلئے ممنوعہ خوراک فیپرونیل کے اجزاء پائے گئے۔ ان انڈوں کو بعد ازاں آسٹریا، برطانیہ، آئرلینڈ، اٹلی اور سلواکیہ برآمد کیا گیا۔ شک ظاہر کیا جا رہا ہے کہ، ان مشتبہ انڈوں کی ایک 20 ہزار انڈوں پر مشتمل کھیپ سپینش صوبہ پائیس باسکو بھی ارسال کی گئی تھی۔ حکام کے مطابق اس کھیپ کو منزل مقصود پر پہنچنے سے قبل ہی روک کر تلف کر دیا گیا ہے۔ف۔پیکس آبے 

Read More

سپینش مردوں کے تشدد سے بچائو کیلئے، 4 لاکھ خواتین کی نگرانی

Aug 14, 2017

بس پریس۔کام۔ ای پی سوشل تنظیم کی رپورٹ کے مطابق گذشتہ دس سالوں میں سپینش پولیس نے 4.15.116 خواتین کو مردوں کے تشدد سے بچانے کیلئے حفاظتی نگرانی میں لئے رکھا۔ جولائی 2007 میں اس حفاظتی نگرانی کے عمل کو مربوط طریقہ سے شروع کیا گیا تھا۔ رپورٹ کے مطابق گذشتہ دس سالوں کے دوران خواتین پر تشدد کی 13 لاکھ شکایات کا اندراج ہوا۔ رپورٹ کے مطابق، شکایات کا اندراج کروانے والی 617 خواتین کا قتل، نظام میں کسی سقم کی نشاندہی کرتا ہے۔ف۔20منٹ 

Read More

باڑ عبور کر کے، مراکش سے سپین میں داخلے کی کوشش ناکام

Aug 11, 2017

بس پریس۔کام۔ صبح 4 بجے کے قریب 250 تارکین وطن کے گروہ نے مراکش سے سپینش شہر سیوتا میں داخلہ کی ناکام کوشش کی۔ داخلہ کی کوشش 'فینکا بیروکال' کے علاقہ میں کی گئی۔ جہاں پولیس کنٹرول کافی کم ہوتا ہے۔ وہیں اسی علاقہ میں پولیس کیمروں کی کمی کی وجہ سے باڑ عبور کرنا نسبتا آسان ثابت ہوتا ہے۔ اطلاع ملنے پر مراکشی اور سپینش سرحدی دستوں نے ان تارکین وطن کی اس کوشش کو ناکام بنا دیا۔ گذشتہ 8 تاریخ کو بھی 1000 کے قریب تارکین نے سپین میں داخلے کی کوشش کی تھی۔ جسے ناکام بنا دیا گیا تھا۔ جبکہ 24 گھنٹے قبل بھی بارڈر چیک پوسٹ پر تارکین وطن نہ دھاوا بول کر سپین میں داخل ہونے کی کوشش کی۔ جن میں سے 187 اس کوشش میں کامیاب ٹھہرے۔ف۔ریدوان۔ ای ایف ای 

Read More

کتلان آزادی ریفرنڈم کا انعقاد نہیں ہو گا شاہ سپین سے ملاقات کے بعد صدر راخوئی کا بیان

Aug 8, 2017

بس پریس۔کام۔ کتلان اسمبلی کے اقدامات، سپینش جمہوریت کیلئے خطرناک ہیں۔ ان خیالات کا اظہار سپینش صدر راخوئی نے شاہ سپین سے ملاقات کے بعد صحافیوں سے گفتگو کے دوران کیا۔ راخوئی کے مطابق، یکم اکتوبرکو کتلان ریفرنڈم کا انعقاد نہیں ہوگا۔ کیونکہ یہ ریفرنڈم غیر قانونی ہے۔ انہوں نے نشاندہی کی کہ، اس طرح کے ریفرنڈم کے انعقاد کیلئے قانون سازی بھی غیر قانونی حیثیت رکھتی ہے۔ البتہ حکومت، آئینی عدالت کی جانب سے کتلان اسمبلی کی قراردادوں کو معطل قرار دینے پر مطمئن ہے۔ف۔ای ایف ای  

Read More

کم ریٹ پر ٹھیکہ: بارسلونا ایرپورٹ پر مسافروں کی مشکل کا باعث

Aug 8, 2017

بس پریس۔کام۔ بارسلونا ایرپورٹ پر مسافروں کی طویل قطاریں، مقامی میڈیا کی شہہ سرخیوں میں جگہ پاتی جا رہی ہیں۔ ان طویل قطاروں کے باعث مسافروں کو چیک ان سے چار سے پانچ گھنٹے قبل ایرپورٹ پر آنا پڑ رہا ہے۔ طویل قطاروں کی وجہ مسافروں کی حفاظتی تلاشی کی ذمہ دار کمپنی 'یولین' کو قرار دیا جا رہا ہے۔ جس کے ملازمین ہڑتال پر ہیں۔ یولین کے ملازمین تنخواہوں میں بہتری اور طویل ڈیوٹی کے خاتمے کا مطالبہ کر رہے ہیں۔ یولین کے ساتھ ساتھ ایرپورٹ کا انتظام سنبھالنے والی کمپنی آئینا کی انتظامی صلاحیت پر بھی سوالیہ نشان لگائے جارہے ہیں۔ ان سوالات کا جواب سیر ریڈیو کے ایک پروگرام میں ڈی جی بارسلونا مارین کا کہنا ہے کہ، ہم نے تمام قانونی ضوابط پورے کرتے ہوئے، یولین کو ٹھیکہ دیا تھا۔ کیونکہ یولین نے سابقہ کمپنی پروسیگور سے ٪2 کم بجٹ میں وہی سہولتیں فراہم کرنے کا وعدہ کیا تھا۔ مارین کے مطابق پروسیگور کمپنی کی جانب سے مہنگے داموں خدمات فراہم کرنے کی وجہ، اس کمپنی کا تمام اخراجات کو بہتر طریقہ سے جاننا تھا۔ یولین کے ملازمین اس وقت اپنی تنخواہوں میں ماہانہ 350 یورو اضافہ کا مطالبہ کرتے ہوئے ہڑتال پر ہیں۔ جس کے باعث ایرپورٹ پر لمبی قطاریں مسافروں کو مشکل سے دوچار کر رہی ہیں۔ف۔ای ایف ای  

Read More

بارسلونا ایرپورٹ: سکیورٹی عملہ کا جمعہ کے روز سے ہڑتال پر جانے کا اعلان

Aug 3, 2017

بس پریس۔کام۔ کل 4 اگست جمعہ کے روز سے بارسلونا ایرپورٹ پر سکیورٹی عملہ کی جانب سے ہڑتال پر جانے کا اعلان کر دیا گیا ہے۔ ایرپورٹ پر مسافروں کی  'تلاشی' کا ذمہ دار سکیورٹی عملہ "یولین" نامی کمپنی کی جانب سے فراہم کیا جاتا ہے۔ اگرچہ، ہڑتال کے اعلان کے بعد مرکزی حکومت نے مداخلت کرتے ہوئے، صرف ٪10 عملہ کو ہڑتال پر جانے کی اجازت دی ہے۔ ہڑتال پر جانے کا فیصلہ یولین کمپنی کے ملازمین کے اجلاس میں بدھ کے روز کیا گیا۔ جس میں کمپنی کے ٪92.5 ملازمین نے شرکت کی۔ لیبر یونین رہنمائوں کے مطابق، سکیورٹی ملازمین کو ماہانہ 950 یورو بطور تنخواہ ادا کیے جا رہے ہیں۔ جب کہ اس کام کے دوران درپیش خطرات، بغیر آرام کیے لمبی ڈیوٹی اور کام کا دبائو تنخواہ کی نسبت بہت زیادہ ہیں۔ یہی وجہ ہے کہ ایرپورٹ پر سکیورٹی عملہ کی کمی ہے۔ وہیں لیبر یونین کے مطابق تنخواہوں کی کمی کی ذمہ دار آئینا بھی ہے۔ جس نے گذشتہ سال جون میں سکیورٹی کی مد میں رکھے 2 کروڑ 36 لاکھ کے بجٹ کو کم کر کے 2 کروڑ 31 لاکھ کر دیا ہے۔ جس کی تمام نقصان ملازمین کو اٹھانا پڑا ہے۔ف۔فیران نادیو

Read More

۔2019 میں 2 کروڑ سپینش برسر روزگار ہوں گے۔ راخوئی ، صدر سپین

Aug 3, 2017

بس پریس۔کام۔ سپینش صدر ماریانو راخوئی نے کہا ہے کہ، پاپولر پارٹی کی صدارتی مہم کے دوران عوام سے کیا گیا وعدہ 2020 کی بجائے 2019 میں ہی پورا کیا جا سکتا ہے۔ حکمران پاپولر پارٹی نے راخوئی کی صدارتی مہم کے دوران 2020 تک سپین میں 2 کروڑ عوام کو روزگار فراہمی کا وعدہ کیا تھا۔ صدر راخوئی نے اپنے ٹویٹ پیغام میں 2016 کے دوران 6.44.337 بیروزگاروں کو نوکریاں فراہم ہونے پر خوشی کا اظہار کیا تھا۔ محکمہ سوشل سکیورٹی سپین کے مطابق جولائی 2017 کے اختتام پر ملک میں 1.84.89.329 افراد برسر روزگار ہیں۔ یہ تعداد دسمبر 2008 کے بعد سب سے بڑی تعداد ہے۔ ان اعداد و شمار کے سامنے آنے کے بعد پاپولر پارٹی اسے اپنی حکومتی پالیسیوں کی کامیابی قرار دے رہی ہے۔ وہیں بارسلونا میں قونصلیٹ قائم کروانے اور پی آئی اے کی اولین فلائیٹ چلوانے والے پاک فیڈریشن سپین کے صدر ثاقب طاہر نے ملک میں کم ہوتی بیروزگاری پر مسرت کا اظہار کیا ہے۔ف۔ای ایف ای 

Read More

کتلان صوبہ میں لکھ پتیوں کی تعداد میں اضافہ جاری

Aug 2, 2017

بس پریس۔کام۔ سپینش صوبہ کتلونیا میں امیر افراد کی آبادی میں مستقل اضافہ جاری ہے۔ صوبہ میں 10 لاکھ یورو سے زائد کی دولت کے حامل افراد کی تعداد 31.951 تک پہنچ چکی ہے۔ ان افراد کی دولت کا حساب لگاتے وقت، ان کے ذمہ قرضہ اور سکنی گھر کو دولت میں شامل نہیں کیا جاتا۔ امیر افراد کی آبادی میں گذشتہ ایک سال کے دوران 577 افراد کا اضافہ ہوا ہے۔ البتہ 3 کروڑ یورو سے زائد دولت رکھنے والوں کی تعداد 123 سے سکڑ کر 118 رہ گئی ہے۔ ڈیڑھ کروڑ سے 3 کروڑ یورو تک دولت کے مالکان کی تعداد 250 سے بڑھ کر 281 اور 6 کروڑ یورو سے زائد دولت کے مالکان 1208 سے بڑھ کر 1231 تک جا پہنچے ہیں۔ف۔پریودیکو

Read More

سپین حکومت نے ایٹمی بجلی گھر”گورونیاء” کی مستقل بندش کا اعلان کر دیا

Aug 2, 2017

بس پریس۔کام۔ سپینش صدر راخوئی نے ملک کے سب سے قدیم اور چھوٹے ایٹمی بجلی گھر کی مستقل بندش کا فیصلہ کرلیا ہے۔ وزیر توانائی البارو نادال کے مطابق، وہ فوری طور پر اس ایٹمی بجلی گھر کی بندش کے حکم نامہ پر دستخط کریں گے۔ سپینش اپوزیشن پارٹیاں اس بجلی گھر کی بندش کا مطالبہ ایک عرصہ سے کر رہی تھیں۔ اور اس بجلی گھر کو ایٹمی توانائی کے خلاف تحریک میں ایک ریفرنس کے طور پر پیش کیا جاتا رہا تھا۔ وہیں صوبائی نائب صدر خوسے انتونیو نے وفاقی حکومت کے اس فیصلہ کو ایک تاریخی غلطی قرار دیتے ہوئے۔ اس بجلی گھر کی ری- انڈسٹرلائزیشن کا مطالبہ کیا ہے۔ بجلی گھر میں 400 ملازمین ملازمت کر رہے ہیں۔ جن میں سے آدھے ایندیسا اور ایبردرولا بجلی ساز کمپنیوں کے براہ راست ملازم ہیں۔ف۔گارونیا  

Read More

سپین: کالے جادو کے زیر اثر رکھ کر جسم فروشی کروانے والا گروہ گرفتار

Aug 2, 2017

بس پریس۔کام۔ سپینش پولیس نے مالاگا، میڈریڈ اور بارسلونا میں قائم جسم فروشی کے ایک گروہ کو ختم کر دیا ہے۔ گروہ کے خاتمے سے 15 خواتین کو رہائی ملی ہے۔ جن سے زبردستی جسم فروشی کا کام کروایا جا رہا تھا۔ پولیس حکام کے مطابق ان میں 5 کمسن بچیاں بھی شامل تھیں۔ جنہیں افریقی جادو "بودو یا کالے جادو" کے زیر اثر رکھ کر اس قبیح فعل پر مجبور کیا جاتا تھا۔ پولیس حکام نے 1 سال قبل دو شہریوں کی شکایت پر اس گروہ کے خلاف تحقیقات شروع کی تھیں۔ جنہوں نے مالاگا شہر کے صنعتی علاقے میں کمسن بچیوں کی موجودگی کی نشاندہی کی تھی۔ یہ گروہ نائجیریا سے خواتین کو اپنے چنگل میں پھنساتا تھا۔ اور بعد ازاں انہیں "بودو یا کالے جادو" کے زیر اثر لا کر، مختلف رستے استعمال کرتے ہوئے سپین منتقل کیا جاتا تھا۔ جہاں انہیں سفری اخراجات کی ادائیگی تک زبردستی اس کاروبار سے منسلک کر دیا جاتا تھا۔۔ف۔مونولو اربانو   

Read More

روسی جہازوں کا تعاقب۔ سپینش جنگی جہاز فن لینڈ کی ہوائی حدود میں داخل۔ تحقیقات کا اعلان

Aug 2, 2017

بس پریس۔کام۔ فن لینڈ حکومت نے سپین جنگی ہوائی جہازوں کی جانب سے اس کی ملکی سرحدوں کی خلاف ورزی کرنے پر تحقیقات کا اعلان کر دیا ہے۔ یہ واقعہ منگل کی صبح 9 بجے پیش آیا۔ جب نیٹو مشن پر تعینات، 2 سپینش ایف-18 جہازوں نے دارالحکومت ہیلسنکی سے 45 کلومیٹر دور سرحد عبور کی۔ اور تقریبا ایک منٹ تک فن لینڈ کی ہوائی حدود میں موجود رہے۔ یہ جنگی جہاز اسٹونیا کے ایک فوجی بیس پر متعین ہیں۔ جس کا دورہ 2 ہفتے قبل سپینش صدر ماریانو راخوئی نے کیا تھا۔ وزارت دفاع فن لینڈ کے ترجمان کے مطابق، اس خلاف ورزی کی تحقیقات شروع کر دی گئی ہیں۔ اور اگر ضرورت محسوس ہوئی تو، وزارت دفاع سپین کے ساتھ رابطہ کر کے ان سے اس خلاف ورزی بارے دریافت کیا جائے گا۔ آخری دفعہ سپینش ہوائی جہازوں نے 2005 میں فن لینڈ کی ہوائی حدود کی خلاف ورزی کی تھی۔ف۔وزارت دفاع سپین

Read More

کتلان وی ٹی سی: 2 سال تک بیچی نہیں جا سکیں گی۔ قانون میں تبدیلی کی تجویز آج پیش ہو گا

Aug 1, 2017

بس پریس۔کام۔ وی ٹی سی گاڑیاں اگر گلی میں سے "بغیر طلب کیے" مسافر بٹھائے گی، تو اسے 1 ہزار یورو جرمانہ جبکہ وی ٹی سی کا سٹکر نہ لگانے پر 2 ہزار یورو جرمانہ عائد کیا جائے گا۔ جوسیپ رول کتلان وزیر برائے علاقائی امور کے مطابق ان اقدامات سے اوبر اور کابی فائی کے ساتھ کام کرنے والی وی ٹی سی گاڑیوں کے غیر قانونی اقدامات کی روک تھام ہو سکے گی۔ قانون میں تبدیلی کی تجاویز آج کتلان ایگزیکٹو کونسل میں پیش کی جائیں گی۔ وہیں وی ٹی سی گاڑیوں کے مالکان پرگاڑی کو خریدنے کے بعد دو سال تک اسے فروخت کرنے پر پابندی عائد ہو گی۔ بارسلونا ٹیکسی سیکٹر کے رہنما طاہر فاروق وڑائچ کے مطابق، عدالتی حکم پر سپین بھر میں 10 ہزار وی ٹی سی لائسنس جبکہ کتلونیا میں 3 ہزار وی ٹی سی لائسنس جاری کیے جا رہے ہیں۔ جس کے باعث بارسلونا کا ٹیکسی سیکٹر شدید مشکلات کا شکار ہے۔ وہیں انہوں نے اس بات کی بھی نشاندہی کی کہ، کتلونیا میں جاری ہونے والے لائسنسوں میں سے 800 لائسنس صرف ایک کمپنی نے حاصل کیے ہیں۔ جو کہ کارپوریٹ سیکٹر کی اس سیکٹر میں آمد کی نشاندہی کرتی ہے۔ جبکہ ٹیکسی سیکٹر میں ٪90 لائسنس ایک گاڑی ایک مالک کے اصول کے تحت لائسنس  جاری کیے گئے ہیں۔ جس کی وجہ سے ٹیکسی مالکان کا روزگار خطرے سے دوچار ہے۔ف۔البرت بیرتران 

Read More

سپین: یوری بور، میں کمی۔ فلیٹوں کی قسط میں 63 یورو مزید کمی

Aug 1, 2017

بس پریس۔کام۔ یوری بور، کی شرح ماہ جولائی میں مزید کم ہو کر اپنی تاریخ کی کم ترین سطح ٪0.154- پر آگئی ہے۔ جس کے بعد فلیٹوں کی بینک اقساط میں مزید 62.64 یورو سالانہ کی کمی متوقع ہے۔ مگر یہ کمی صرف ان اقساط میں ہو گی۔ جن کے قرضہ کی تجدید مستقبل قریب میں متوقع ہے۔ف۔پریودیکو

Read More

بغیر بحث کے قانون منظور: قانون سپینش آئینی عدالت نے معطل کردیا

Aug 1, 2017

بس پریس۔کام۔ سپینش آئینی عدالت نے وفاقی حکومت کی درخواست پر کتلان صوبائی حکومت کا منظور شدہ، مسودہ قانون معطل کر دیا ہے۔ یہ قانون گذشتہ جمعہ کے روز منظور ہوا تھا۔ جس کے تحت صوبائی اسمبلی کو یہ اختیار حاصل ہو گیا تھا کہ، وہ صرف ایک دن میں بغیر بحث مباحثہ کے کسی بھی قانون کو منظور کر سکتی ہے۔ جنتس پل سی اور کوپ پارٹیاں، اس قانون کی سہولت سے کتلان آزادی کا عمل تیز تر کرنے کی خواہش رکھتی تھیں۔ سپینش آئینی عدالت کی جانب سے حتمی فیصلہ آنے تک یہ قانون معطل تصور سمجھا جائے گا۔  

Read More

سپین: 2017 میں 8 کروڑ سیاحوں کی آمد متوقع

Jul 31, 2017

بس پریس۔کام۔ بظاہر محسوس ہو رہا ہے کہ، عالمی سطح پر سیاحتی ممالک میں غیر یقینی صورتحال کا سب سے زیادہ فائدہ سپین نے اٹھایا ہے۔ گذشتہ سال یورپ کے ٪30 سیاحوں نے سپین کو سیاحت کیلئے چنا۔ یورپ کے علاوہ چینی اور ایشیائی سیاحوں کے رحجان نے سپین کو 7 کروڑ 55 لاکھ 60 ہزار سیاحوں کی میزبانی کا شرف بخشا۔ جب کہ اس سال ماہرین مزید 1 کروڑ یعنی ساڑھے 8 کروڑ سیاحوں کی آمد بارے پر امید ہیں۔ سپین میں سیاحوں کے پسندیدہ شہروں میں سرفہرست بارسلونا اور اس کے بعد میڈریڈ، ایبیزا، مایورکا، ویلینسیا، تینریفے، بینی دورم ہیں۔ سپین میں مقیم ممتاز پاکستانی کاروباری شخصیت ریاض بٹ آف قرطبہ کے مطابق، سیاحوں کی سپین میں کثیر تعداد میں آمد کے باعث ریسٹورنٹ انڈسٹری کی آمدن میں نمایاں اضافہ ہوا ہے۔ جہاں روایتی طعام گاہیں ان سیاحوں سے بھری پڑی ہوتی ہیں۔ وہیں فاسٹ فوڈ کا کاروبار چمک اٹھتا ہے۔ فاسٹ فوڈ کاروبار میں پاکستانی کمیونیٹی کی اکثریت کے باعث سیاحوں میں اضافہ کمیونیٹی کی خوشحالی کا بھی باعث بنتا ہے۔ف۔ دانی کامینال  

Read More

بارسلونا: اگست میں بھی گاڑیوں کی گلیوں میں پارکنگ پر ادائیگی کرنی ہو گی

Jul 31, 2017

بس پریس۔کام۔ مسلسل دوسرے سال، اس اگست میں بھی گاڑی مالکان کو سبز اور نیلی پارکنگ لائنوں کی حامل گلیوں میں گاڑی کھڑی کرنے پر پارکنگ فیس ادا کرنی ہو گی۔ بلدیاتی حکومت اس فیس کے نفاذ کے باعث شہریوں کو پیدل چلنے اور عوامی ٹرانسپورٹ سسٹم کی جانب راغب کرنا چاہتی ہے۔ 2016 میں بلدیہ کو اس پارکنگ سسٹم سے 3.89 کروڑ یورو آمدن ہوئی تھی۔ف۔جوان پوئیج 

Read More

میئر بارسلونا، گلیوں میں کرکٹ/فٹ بال کھیلنے پر جرمانوں کا قانون ختم کرنے کی خواہشمند

Jul 31, 2017

بس پریس۔کام۔ بلدیہ بارسلونا کی عہدیدار ماریا تورونیو کے مطابق، جن عوامی مقامات "چوکوں اور گلیوں" میں جتنے زیادہ بچے فٹ بال کھیلیں گے۔ وہ ان کے محفوظ ہونے کی نشانی ہو گی۔ کیونکہ ہمیشہ محفوظ عوامی مقام، بچوں کو اپنی جانب راغب کرتا ہے۔ بارسلونا شہر کے قانون کے مطابق بچوں کے عوامی مقامات پر فٹ بال/کرکٹ کھیلنے پر پابندی ہے۔ شہری حکومت اس بات پر غور کر رہی ہے۔ کہ، کہیں بچوں کے کھیلنے پر پابندی لگانے کی وجہ سے تو بچے انٹرنیٹ کی جانب زیادہ راغب تو نہیں ہو رہے۔ شہری قانون کے مطابق عوامی مقامات پر کرکٹ/ فٹ بال کھیلنے کی وجہ سے 750 سے 1500 یورو تک جرمانہ کیا جا سکتا ہے۔ شہری پولیس نے 2015 میں اس قانون کے تحت 39 دفعہ اور 2016 میں 10 دفعہ جرمانہ کیا ہے۔ شہری پولیس کے مطابق یہ جرمانے بھی انتہائی حالت کی صورت میں کیے جاتے ہیں۔ میئر بارسلونا آدا کولائو، اس شہری قانون کو اپنی مدت حکومت ختم ہونے سے قبل تبدیل کرنا چاہتی ہیں۔ اورچاہتی ہیں کہ، پولیس بچوں کو کھیلنے پر جرمانہ کرنے کی بجائے، اگر بچے محلہ داروں کو تنگ کر رہے ہیں۔ اور پولیس انہیں کھیلنے سے منع کرے تو، نافرمانی کو صورت میں بچوں کو جرمانہ کیا جائے۔ پاک فیڈریشن سپین کی تعلیمی کمیٹی کے انوارالحق کے مطابق شہری حکومت نے اس سے قبل پاکستانی اکثریتی محلہ روال میں بچوں کو شام کے اوقات میں سکولوں کے صحنوں/گرائونڈوں میں کرکٹ کھیلنے کی اجازت دی تھی۔ جس سے روال میں بچوں کے کرکٹ کھیلنے کا مسئل حل ہو گیا تھا۔ اب اس ماڈل کو شہر کے دیگر محلوں میں بھی لاگو کرنے کا منصوبہ زیر غور ہے۔ جو قابل تحسین امر ہے۔ف۔جوردی کورتینا

Read More

سپین: پودیموس+سوشلسٹ مل کر وفاقی حکومت بنا سکتے ہیں۔ پابلو اگلیسیاس

Jul 31, 2017

بس پریس۔کام۔ پودیموس پارٹی سپین کے سیکرٹری جنرل پابلو اگلیسیاس نے اپنے بیان میں سوشلسٹ پارٹی کے سیکرٹری جنرل پیدرو سانچیز کے پودیموس کے ساتھ بعض میٹنگز میں ادا کئے گئے ان الفاظ پر اطمینان کا اظہار کیا ہے۔ جس میں انہوں نے کہا تھا کہ، ہم لوگ مستقبل میں پارٹنر بن سکتے ہیں۔ اگلیسیاس کے مطابق، سانچیز کے ان الفاظ پر وہ انہیں اپنی طرف سے اعتماد کا یقین دلاتے ہیں۔ انہوں نے کہا کہ، انہیں ان الفاظ کی صداقت پر یقین ہے۔ اور مستقبل میں ہم دونوں پارٹیاں مل کر حکومت سازی کر سکتی ہیں۔ ماہرین کے مطابق دونوں پارٹیوں کے درمیان اعتماد کی فضاء آگے بڑھ رہی ہے۔ یہی وجہ ہے کہ، دونوں پارٹیوں نے مل کر سپینش صدر ماریانو راخوئی کو قومی اسمبلی کے خصوصی اجلاس میں گرتل کرپشن سکینڈل کی بابت استفسار کیلئے اسمبلی اجلاس بلانے کی مشترکہ درخواست دی ہے۔ آئی سی وی کے سابق امیدوار قومی اسمبلی سپین و جنرل سیکرٹری پاک فیڈریشن سپین راجہ بابر ناصر کے مطابق، اگلیساس اور سانچیز کو ابھی ایک طویل عرصہ انتظار کرنا ہو گا۔ تاکہ دونوں پارٹیوں کے درمیان اعتماد کی فضاء پیدا ہو۔ اور موجودہ صدر راخوئی کے خلاف تحریک عدم اعتماد پیش کی جاسکے۔ وہیں دوسری طرف پودیموس کے اگلیسیاس اس بات سے بھی واقف ہیں کہ، پارٹی کے اندر بعض لوگ سوشلسٹوں کے ساتھ مل کر حکومت بنانے پر تحفظات رکھتے ہیں۔ اسی لئے اگلیسیاس نے پارٹی کے اندر ممکنہ مخلوط وفاقی حکومت کے قیام کیلئے بحث کا آغاز کر دیا ہے۔ف۔ای ایف ای 

Read More

کتلان صوبائی حکومت کا انتخابی سامان خریدنے کا ٹھیکہ: رینجرز تحقیقات کرے گی

Jul 30, 2017

بس پریس۔کام۔ سپین رینجرز، کتلان صوبائی حکومت کی جانب سے انتخابی سامان خریدنے کے اعلان کی تحقیقات کرے گی۔ کتلان حکومت کے مطابق یہ سامان آئندہ صوبائی انتخابات میں استعمال ہو گا۔ جس پر 8.97.520 یورو اخراجات آئیں گے۔ سامان میں بیلٹ بکس اور بیلٹ پیپر بھی شامل ہوں گے۔ جبکہ وفاقی حکومت کا خیال ہے کہ، یہ سامان یکم اکتوبر 2017 کو ہونے والے کتلان ریفرنڈم میں استعمال ہو سکے گا۔ وہیں وفاقی حکومت ان اطلاعات کی بھی تحقیق کر رہی ہے۔ کہ، صوبائی حکومت ریفرنڈم کے انعقاد پر 40 کروڑ یورو سرکاری خزانے سے خرچ کرے گی۔ وفاقی حکومت نے ریفرنڈم کے انعقاد کیلئے رقم صوبائی خزانہ سے استعمال کرنے کی صورت میں صوبائی حکومت کی مالی امداد بند کرنے کا اعلان کر رکھا ہے۔ف۔ای پی  

Read More

بارسلونا ٹرین حادثہ 56 زخمی

Jul 28, 2017

بس پریس۔کام۔ بارسلونا کے استاسیون دے فرانسیا ریلوے اسٹیشن پر آر2 سائوتھ ٹرین حادثہ کا شکار ہو گئی۔ جس کے باعث 56 افراد زخمی ہوئے۔ حادثہ صبح 7.15 پر پیش آیا۔ واقعہ کے وقت ٹرین ڈرائیور نے پلیٹ فارم پر داخل ہوتے ہوئے بریک لگانی شروع کر دی تھی۔ بریک مکمل طور سے نہ لگنے کی وجہ سے ٹرین پلیٹ فارم کے اختتام پر لگے حفاظتی جنگلے سے جا ٹکرائی۔ جس کے باعث تمام مسافر گر گئے۔ عینی شاہدین کے مطابق ٹرین حادثہ کے بعد 2 تا 3 منٹ تک ٹرین کے دروازے مکمل طور سے بند رہے۔ دروازے کھولے جانے تک ابتدائی امداد دینے والا عملہ پہنچ چکا تھا۔ جس نے زخمیوں کو فوری طبی امداد مہیا کرنا شروع کر دی۔ ٹرین حکام نے حادثہ کی تحقیقات کا حکم جاری کر دیا ہے۔ف۔ال پریودیکو 

Read More

سپینش ڈرائیونگ ممتحن ہڑتال پر: 70 ہزار امتحان معطل

Jul 28, 2017

بس پریس۔کام۔ محکمہ ٹریفک سپین کے مطابق 2017 کے جون اور جولائی کے مہینوں میں ٹریفک ممتحنوں کی ہڑتال کے باعث 70 ہزار ڈرائیونگ امتحان معطل کیے گئے ہیں۔ محکمہ کے مطابق گذشتہ سال ان دو مہینوں میں 1.91.000 امتحان لیے گئے تھے۔ جو امسال کم ہو کر 1.20.000 رہ گئے ہیں۔ محکمہ ٹریفک کے مطابق، انہوں نے ہڑتالی ممتحنوں کے مطالبات کو تسلیم کرنے کیلئے اپنے دائرہ کار میں رہتے ہوئے ہر طرح کی مدد فراہم کی ہے۔ یہی وجہ ہے کہ ٪100 ممتحنوں نے ہڑتال کی اپیل پر کان نہیں دھرے۔ ممتحن تنخواہوں میں اضافے اور کام کا دبائو کم کرنے کیلئے مزید ممتحنوں کی بھرتی کا مطالبہ کر رہے ہیں۔ جو کہ محکمہ ٹریفک کے مطابق ان کے دائرہ اختیار سے باہر کے امور ہیں۔ف۔سیدیدا

Read More

سپینش معیشت، بحران سے قبل کی سطح پر پہنچ چکی ہے۔ راخوئی، صدر سپین

Jul 28, 2017

بس پریس۔کام۔ سپینش صدر ماریانو راخوئی نے ایک تقریب سے خطاب کے دوران کہا ہے کہ، سپینش معیشت بہتری کی جانب گامزن ہے اور اس وقت معیشت مالی بحران سے قبل کی سطح تک پہنچ چکی ہے۔ راخوئی نے معیشت میں بہتری کی وجہ ملکی مالیاتی سسٹم میں کی گئی تبدیلیوں کو قرار دیا۔ سپینش صدر نے اس موقع پر ادارہ شماریات کے اعدادوشمار کی نشاندہی کی۔ جن کے مطابق امسال دوسری سہہ ماہی میں سپینش معیشت میں، پہلی سہہ ماہی کی نسبت ٪0.9 اضافہ ہوا ہے۔ انہوں نے ان اعدادوشمار کو بہترین قرار دیتے ہوئے امید ظاہر کی کہ، سال کے اختتام پر ملکی معیشت میں بڑھوتری ٪3 اضافہ کی شرح تک جا پہنچے گی۔ بیروزگاری سے متعلق راخوئی نے کہا کہ، مالی بحران سے لے کر اب تک ملک میں 19 لاکھ لوگوں کو نئی نوکریاں فراہم کی گئی ہیں۔ف۔ای ایف ای 

Read More

بارسلونا بلدیہ: ستمبر سے بغیر ریذیڈنس مقیم افراد کو شناختی کارڈ جاری کرے گی

Jul 27, 2017

بس پریس۔کام۔ بلدیہ بارسلونا ستمبر 2017 سے شہر میں ریذیڈنس کارڈ کے بغیر مقیم افراد کو شناختی کارڈ جاری کرے گی۔ بلدیہ کے مطابق، اس کارڈ کی موجودگی سے تارکین وطن کو شناختی پڑتال کے عمل کے دوران آسانی حاصل ہوگی۔ ایمیگرنٹس دوست سیاسی پارٹی آئی سی وی پر مشتمل بلدیاتی حکومت کے ڈپٹی میئر جائمے آسینس کے مطابق، تارکین وطن کا قانون، ادارہ جاتی اعتصاب پر مبنی ہے۔ اور یہ تارکین وطن کو مافیا، کاروباری افراد اور حکومت کے ہاتھوں نقصان پہنچانے کے وسیع مواقع فراہم کرتا ہے۔ وہیں آئی سی وی کی جانب سے سابق امیدوار قومی اسمبلی سپین، و جنرل سیکرٹری پاک فیڈریشن سپین راجہ بابر ناصر کے مطابق، حکومتی ٹیم اگلے بلدیاتی اجلاس میں ایک منصوبہ پیش کرنے جا رہی ہے۔ جس کے تحت بغیر ریذیڈنس تارکین وطن، بلدیہ کی جانب سے فراہم کی جانے والی شہری سہولیات سے مستفید ہو سکیں گے اور اس منصوبہ کی منظوری کے بعد اگر کسی تارک وطن کو زونا فرانکا جیل میں داخلہ کا خدشہ ہو یا سپین بدری کا خدشہ ہو، تو بلدیہ بارسلونا ایسے افراد کو ایک سرکاری سرٹیفیکیٹ جاری کرے گی۔ جس میں اس کی جانب سے مکمل کیے گئے کورسز، مختلف ایسوسی ایشنز کے ساتھ تعلق، مختلف اداروں کے ساتھ تعلق ظاہر ہو گا۔ جس کے باعث یہ سرٹیفیکیٹ عدالت میں پیش کرکے یہ بات ثابت کی جاسکے گی کہ، یہ تارک وطن معاشرتی ادغام کے مرحلہ سے گذر رہا ہے۔ اور اس کی سپین سے بیدخلی یا زونا فرانکا جیل میں مننتقلی منسوخ کی جا سکے گی۔ یہ کارڈ ستمبر سے جاری کیا جائے گا۔ اور اس کے حصول کیلئے واحد شرط تارک وطن کا گذشتہ ایک سال سے سپین میں اور گذشت چھ ماہ سے بارسلونا میں مقیم ہونا ہے۔ 

Read More

چامارتین، میڈریڈ منصوبہ: 6 ارب یورو کی سرمایہ کاری۔ 2 لاکھ نئی نوکریاں

Jul 27, 2017

بس پریس۔کام۔ بلدیہ میڈریڈ، وفاقی وزارت ترقی سپین اور کاستیعانہ نارتھ ٹائون کمیٹی نے "میڈریڈ، نیا نارتھ" کے عنوان سے چامارتین علاقہ میں 11 ہزار نئے رہائشی فلیٹس کے منصوبہ کا اعلان کر دیا ہے۔ اس سے قبل اس علاقہ میں 17 ہزار فلیٹس تعمیر کرنے کا اعلان کیا گیا تھا۔ مجوزہ منصوبہ پر کل 6 ارب یورو لاگت آئے گی اور اس کے باعث 2 لاکھ نئی نوکریاں مہیا کی جاسکیں گی۔ 28 لاکھ مربع میٹر پر محیط اس منصوبہ میں ٪20 فلیٹس کو پروٹیکشن سول کے تحت دیا جائے گا۔ف۔سیر۔ای ایف ای  

Read More

سپین میں بیروزگاری کی شرح ٪17 تک گر گئی

Jul 27, 2017

بس پریس۔کام۔ سپینش ادارہ شماریات کے مطابق ملک میں بیروزگاری کی شرح 2017 کی دوسری سہہ ماہی میں 1.5 پوائنٹ گر کر ٪17.22 تک آگئی ہے۔ جس کا مطلب سال کی دوسری سہہ ماہی میں 3.40.700 بیروزگار افراد کو نئی نوکریوں کی فراہمی ہے۔ جس کے بعد بیرزگاروں کی تعداد 37.14.300 رہ گئی ہے۔ وہیں کتلونیا میں بھی بیروزگاری کی شرح کم ہو کر ٪13.20 رہ گئی ہے۔ف۔فیران نادیو  

Read More

کتلان آزادی ریفرنڈم ویب سائٹ بنانے پر، ڈی جی اطلاعات کے خلاف مقدمہ

Jul 27, 2017

بس پریس۔کام۔ یکم اکتوبر 17 کو منعقد ہونے والے کتلان آزادی ریفرنڈم کی ویب سائٹ بنانے کے جرم میں ڈی جی اطلاعات جائومے کلوتیت کے خلاف مقدمہ قائم کر دیا گیا ہے۔ اے سی این خبر ایجنسی کے مطابق ڈی جی صبح 8.30 پر رینجرز حکام کے سامنے پیش ہوئے تھے۔ جہاں ان سے ریفرنڈم سے متعلق سوالات کیے گئے۔ کتلان صدر پوئیج دے مونتے نے ان اقدامات کو ایک غلطی اور اختیارات سے تجاوز قرار دیا ہے۔ف۔اے سی این 

Read More

سپین بحری گارڈ نے کھلے سمندر میں 11.062 تارکین وطن کو بچا لیا

Jul 27, 2017

بس پریس۔کام۔ سپینش بحری گارڈز نے 2016 کی پہلی شش ماہی میں 11.062 تارکین وطن کو کھلے سمندر میں ڈوبنے سے بچا چکی ہے۔ ایجنسی کے مطابق چھ ماہ میں 2518 کشتیوں کو امداد فراہم کی گئی۔ ایجنسی اپنے قیام سے اب تک 24 برسوں میں 2.85.000 افراد کو کھلے سمندر میں ڈوبنے سے محفوظ رکھ چکی ہے۔ف۔سالوامینتو ماریتیمو

Read More

سپین کے اہم شہروں میں ٹیکسی سیکٹر کی پہیہ جام ہڑتال

Jul 27, 2017

بس پریس۔کام۔ سیتائے، می ٹیکسی اور الیتے کی جانب سے جمعرات کے روز بارسلونا، میڈریڈ سمیت دیگر شہروں میں ٹیکسی کی 24 گھنٹے طویل پہیہ جام ہڑتال کی گئی۔ وہیں میڈریڈ میں وفاقی وزارت ترقی کے صدر دفتر کے سامنے مظاہرہ بھی کیا گیا۔ مظاہرین حکومت سپین سے لگژری گاڑیوں کے لائسنسوں کے حوالے سے موجودہ قانونی ابہام کو ختم کرنے کا مطالبہ کر رہے تھے۔ ہڑتال کے باعث بارسلونا ایرپورٹ پر صبح 6 بجے سے ہی ٹیکسیاں نایاب ہو گئیں تھیں۔ جس کے باعث مسافروں کو دیگر متبادل ذرائع آمدورفت پر انحصار کرنا پڑا۔ البتہ سپین بھر کے ٪70 ٹیکسی ڈرائیوروں کی نمائندگی کی دعویدار فیڈے ٹیکسی نے اس ہڑتال میں حصہ لینے کی بجائے پیر کے روز ہڑتال کرنے کا اعلان کیا ہے۔ف۔خورخے پاریس 

Read More

گرتل کرپشن سکینڈل: سپینش صدر، قومی اسمبلی میں پیش ہوں۔ اپوزیشن رہنمائوں کا مطالبہ

Jul 27, 2017

بس پریس۔کام۔ پودیموس اور سوشلسٹ پارٹی کے رہنمائوں پابلو اگلیسیاس اور پیدرو سانچیز نے جمعرات کے روز ملاقات میں سپینش صدر ماریانو راخوئی کی گرتل کرپشن سکینڈل کے باعث عدالت میں پیشی کے بعد قومی اسمبلی کا غیر معمولی اجلاس بلانے کیلئے مشترکہ درخواست دینے پر اتفاق کر لیا ہے۔ پودیموس پارٹی کے مطابق، اس حوالہ سے رابطوں میں پہل سوشلسٹ رہنما پیدرو سانچیز کی جانب سے کی گئی۔ جس کے بعد دونوں رہنمائوں میں پیغامات کا تبادلہ کیا گیا۔ دونوں اہم اپوزیشن رہنما، قومی اسمبلی کے غیر معمولی اجلاس میں راخوئی سے کرپشن کیس میں اپنی ذمہ داری تسلیم نہ کرنے اور عدالت میں اپنے دیے جانے والے بیان سے متعلق دریافت کرنا چاہتے ہیں۔ دوسری طرف سیودادانا پارٹی کے رہنما البرت ریویرا نے اس غیر  معمولی اجلاس کی طلبی سے متعلق ووٹنگ کے وقت غیر حاضر یا مخالفت میں ووٹ دینے کے اعلان کیا ہے۔ف۔ای پی 

Read More

ریان ایر کی 5 لاکھ ٹکٹیں ۔ 14.99 یورو میں دستیاب

Jul 25, 2017

بس پریس۔کام۔ کم کرائے کی آئرش ایر لائن ریان ایر نے منگل کے روز سے 5 لاکھ ٹکٹیں 14.99 یورو فی ٹکٹ کے عوض فروخت کیلئے پیش کر دی ہیں۔ ان ٹکٹوں کو خریدنے والے ستمبر17 سے جنوری18 کے درمیان فضائی سفر کر سکیں گے۔ امسال پہلی سہہ ماہی میں ایرلائن نے ساڑھے 3 کروڑ مسافروں کو اپنی سفری خدمات پیش کر کے 39 کروڑ 70 لاکھ یورو کا منافع کمایا ہے۔ جبکہ اس عرصہ کے دوران ایرلائن کا اوسط کرایہ 40 یورو فی مسافر رہا۔ ریان ایر روزانہ 34 ممالک کے 200 شہروں کو 1800 پروازوں کے ذریعہ ایک دوسرے سے منسلک رکھتی ہے۔ جس سے سالانہ 13 کروڑ مسافر سفر کرتے ہیں۔ ایرلائن بوئنگ 737 کے 400 طیاروں کی مالک ہے جبکہ اس نے 300 مزید طیاروں کی خرید کا آرڈر دے رکھا ہے۔ف۔جوسیپ گارسیا، بارسلونا  

Read More

جمعہ کے روز سپینش ٹرین ہڑتال: 274 ٹرینیں کینسل

Jul 25, 2017

بس پریس۔کام۔ سپینش ٹرین کمپنی رینفے نے جمعہ کے روز ہونے والی ہڑتال کے باعث تیز رفتار ٹرین آبے اور درمیانے اور طویل فاصلے کی 274 ٹرینوں کو منسوخ کرنے کا اعلان کیا ہے۔ ہڑتال کا اعلان بائیں بازو کی سی جی ٹی لیبر یونین نے کیا ہے۔ف۔ال پریودیکو 

Read More

بارسلونا ایرپورٹ کا “پوشیدہ” دروازہ: لمبی قطاروں کا توڑ

Jul 25, 2017

بس پریس۔کام۔ بارسلونا ایرپورٹ پر نئے یورپی ضابطے کے مطابق شینگن ممالک کے مسافروں کو بھی پاسپورٹ کنٹرول سے گذارا جا رہا ہے۔ جس کے باعث بارسلونا ایرپورٹ پر مسافروں کو دو گھنٹہ سے زیادہ عرصہ تک پاسپورٹ کنٹرول کی قطاروں میں کھڑا ہونا پڑ رہا ہے۔ ان لمبی قطاروں سے چھٹکارا پانے کا بہترین طریقہ یہ ہے کہ، مسافر بورڈنگ کارڈ حاصل کرنے یا سامان ایرلائن کے حوالہ کرنے کے بعد "سالیدا" والے فلور سے نیچے اتر کر "ییعگادا" والے فلور پر آ جائے اور وہاں موجود کافی شاپس سے گذرتا ہوا، پارکنگ ایریا "اے" کی جانب چل پڑے۔ پارکنگ ایریا "اے" کے دروازے کے فوری بعد ریجنل پروازوں کیلئے مختص 3 سکیورٹی چیک سے گذر کراپنے مطلوبہ دروازے تک باآسانی پہنچ سکتے ہیں۔ بارسلونا ٹیکسی سیکٹر کے رہنما طاہر فاروق کے مطابق اس دروازہ سے متعلق کوئی بھی ایرلائن مسافروں کو آگاہ نہیں کرتی۔ جس کے باعث مسافر تکلیف کا شکار ہوتے ہیں۔ بارسلونا ایرپورٹ کے عملہ کے ایک رکن کے مطابق، اس فاسٹ ٹریک کی نشاندہی ایک پوسٹر کے ذریعہ بھی کی گئی ہے۔ لیکن یہ پوسٹر غلط جگہ پر لگایا گیا ہے۔ طاہر فاروق کے مطابق مسافر کو ایرپورٹ لے کر جانے والے پاکستانی ٹیکسی ڈرائیور،اگر شینگن پروازوں کے مسافروں کو اس دروازہ کی بابت آگاہ کردیں تو، ان مسافروں کو جہاں تکلیف نہیں اٹھانا پڑے گی۔ وہیں پاکستانی ٹیکسی ڈرائیوروں کا امیج مزید نکھر جائے گا۔ف۔آئینا

Read More
error: Content is protected !!