May 24, 2017
You can use WP menu builder to build menus

بارسلونا میٹرو لائن 3، ‘سانت فلیو دے یوبریگات’ تک جائے گی

May 6, 2017

بس پریس۔کام/سعد تارڑ۔ کتلان صوبائی حکومت، بارسلونا کی میٹرو لائن نمبر 3 کی سروس کا دائرہ سانت فلیو دے یوبریگات گائوں تک بڑھایا جائے گا۔ میٹرو لائن 3 کو پہلے مرحلہ میں آخری سٹاپ زونا یونیورسیتاریا سے 2.3 کلومیٹر فاصلہ پر اسپلوگاس سینٹر تک پہنچایا جائے گا۔ جس میں سانت جوان دے دیو/پیدرالبیس سٹاپ قائم کیا جائے گا۔ اس منصوبہ پر 18 کروڑ یورو اخراجات ائیں گے۔ اور اس سے 69 لاکھ مسافر مستفید ہوں گے۔ اسپلوگاس کے بعد اس میٹرو سروس کو بتدریج سانت فلیو دے یوبریگات تک پہنچایا جائے گا۔/فیران سیندرا

Read More

بارسلونا انڈسٹریل سکول کی عمارت کو البرٹ آئن سٹائن آڈیٹوریم میں تبدیل کیا جآئے گا

May 6, 2017

بس پریس۔کام/سعد تارڑ۔ 1929 میں تعمیر ہونے والے انڈسٹریل سکول بارسلونا کی عمارت کے ایک حصہ کو 2019 میں آئن سٹائن آڈیٹوریم میں تبدیل کیا جائے گا۔ بارسلونا کی ڈویژنل حکومت عمارت کی اس تبدیلی پر 49 لاکھ 51 ہزار یورو خرچ کرے گی۔/ال پریودیکو  

Read More

فیصلہ کن ووٹ کے حامل سپینش ایم این اے نے ترقیاتی کاموں کیلئے 45 کروڑ یورو مانگ لیے

May 6, 2017

بس پریس۔کام/سعد تارڑ۔ گران کناریا سے ممبر قومی اسمبلی سپین پیدرو قوئیدو نے اپنے ووٹ کے بدلے حکومت سے 45 کروڑ یورو مانگ لیے ہیں۔ نووا کناریا سیاسی جماعت کے ممبر قومی اسمبلی کو یہ اہمیت حاصل ہے کہ، اگر پیدرو نے ووٹ مخالفت میں دیا توسپین کا بجٹ منظور نہیں ہو پائے گا۔ اپنے ووٹ کی طاقت کو جانتے ہوئے، پیدرو نے بجٹ میں 49 ترامیم پیش کرنے کے علاوہ، جزائر کناریا میں مختلف ترقیاتی کاموں کیلئے 45 کروڑ یورو بھی بجٹ میں مختص کرنے کا مطالبہ کر دیا۔ نووا کناریا کے علاوہ سوشلسٹ پارٹی سپین نے بھی 1846 بجٹ ترامیم پیش کی ہیں۔  

Read More

بارسلونا ٹیکسی سیکٹر میں مافیا گروہ سرگرم ہیں۔ گونی، ان آٹو ایسوسی ایشن

May 5, 2017

بس پریس۔کام/سعد تارڑ۔ بارسلونا لگژری گاڑیوں کی ایسوسی ایشن 'ان آٹو' کے سیکرٹری جنرل خوسے ماریا گونی نے بارسلونا ریڈیو کے ساتھ انٹرویو میں کہا ہے کہ، لگژری گاڑیوں کے ڈرائیور قانون کے دائرہ کار کے اندر رہتے ہوئے اپنی خدمات سر انجام دیتے ہیں۔ لیکن ان ڈرائیوروں کو ٹیکسی سیکٹر کی جانب سے دھکمیوں اور غلط رویہ کا سامنا ہے ۔ اگرچہ یہ ڈرائیور اقلیت میں ہیں۔ جو کہ بعض اوقات لگژری گاڑیوں پر تیزاب، اور انڈے پھینکتے ہیں۔ اور بعض دفعہ گاڑیوں کے شیشے توڑ دیتے ہیں۔ ٹیکسی سیکٹر کے حوالہ سے گونی کا کہنا تھا کہ، ٹیکسی سیکٹر میں ہمیں دو طرح کے گروہوں کی جانب سے مسائل کا سامنا ہے۔ ایک تو وہ جو سیکٹر میں مافیا کے طور پر کام کر رہے ہیں اور دوسرا وہ  متشدد گروہ جو کہ، کچھ عرصہ قبل ہی سیکٹر میں متحرک ہوا ہے۔ گونی کے مطابق متشدد گروہوں کی خواہش ہے کہ، ٹرانسپورٹ سیکٹر میں آنے والی تبدیلیاں بارسلونا میں صارفین تک نہ پہنچ پائیں۔ جبکہ دیگر مافیا گروہ غیر قانونی طور پر ٹیکسی لائسنس کرایہ پر حاصل کرتے ہیں۔ گونی کے مطابق ٹیکسی سیکٹر کے مافیا گروہوں نے ماضی میں ٹیکسی کے کرایے ضرورت سے زیادہ بڑھائے۔ جس کیلئے ان مافیا گروہوں نے غلط معاشی جائزے پیش کیے۔ اور آج بارسلونا ٹیکسی کے کرایوں میں کمی کی ضرورت ہے۔ گونی کے مطابق لگژری گاڑی سیکٹر عام شہریوں کی بجائے، سیاحوں اور ایگزیکٹوز کو خدمات فراہم کرتا ہے۔ جو کہ زیادہ منافع بخش ثابت ہوتے ہیں۔ گونی کے مطابق، لگژری گاڑیوں کے سیکٹر کی خواہش ہے کہ وہ بارسلونا ٹیکسی سیکٹر سے ناراض مقامی صارفین کو اپنی طرف متوجہ کرے۔ یاد رہے کہ گونی اس سے قبل خود ایک ٹیکسی ڈرائیور تھا۔ اور اپنا لائسنس بیچ کر اپنی لگژری گاڑی خرید کر بطور ڈرائیور کام کر رہا ہے۔ گونی ماضی میں بطور ٹیکسی ڈرائیور 'رایو' گروپ کے ساتھ منسلک تھا۔ اور لگژری گاڑیوں میں شامل ہونے کے بعد گونی 'ایرو ٹیکسی' گروپ کے ساتھ منسلک ہے۔ 

Read More

بارسلونا۔ شنگھائی ڈائریکٹ فلائیٹ کا آغاز، ٹکٹ 443 یورو

May 5, 2017

بس پریس۔کام/سعد تارڑ۔ بارسلونا ایک اور عالمی شہر سے جڑ گیا۔ آٹھ گھنٹے کی نان سٹاپ پرواز کے بعد شنگھائی چین سے اڑنے والی ایر چائینہ کی فلائیٹ بارسلونا ایرپورٹ پر اتر گئی۔ ایر چائینہ کی یہ پرواز ہفتہ میں تین دن (منگل، جمعرات اور بدھ) دونوں شہروں کو آپس میں ملائے گی۔ ایرچائینہ کی اس فلائیٹ کی سب سے سستی ٹکٹ 443 یورو میں دستیاب ہے۔ ایرلائن حکام کے مطابق دونوں شہروں کے درمیان 2016 میں 1.10.440 شہریوں نے سٹاپ اوور کے ساتھ سفر کیا ہے۔  

Read More

بارسلونا کونسلروں کی کم تنخواہ سے ہونے والی بچت، کہاں خرچ کریں۔ شہریوں سے رائے طلب

May 5, 2017

بس پریس۔کام/سعد تارڑ۔ ایمیگرنٹس دوست سیاسی پارٹی آئی سی وی پر مشتمل بارسلونا کی شہری حکومت نے شہریوں سے رائے طلب کر لی ہے۔ رائے طلب کرنے کی وجہ، بارسلونا این کومون اتحاد کے کونسلروں کی تنخواہوں سے بچنے والی رقم 2.16.000 یورو کا استعمال کہاں کیا جائے پر شہریوں کی رائے لینا ہے۔ میئر آدا کولائو نے جیتنے کی صورت میں اپنی اور اپنی پارٹی کے کونسلروں کیلئے حد تنخواہ 2200 یورو ماہانہ طے کی تھی۔ شہری حکومت اس رقم کو شہر کی سطح پر 6 اور محلہ جاتی بنیادوں پر 20 پراجیکٹس میں سے کسی ایک پراجیکٹ کیلئِے استعمال کرنا چاہ رہی ہے، جس پراجیکٹ کے حق میں زیادہ ووٹ آئیں گے۔ اس پراجیکٹ پر یہ رقم خرچ کر دی جائے گی۔ ووٹ ڈالنے کے خواہشمند شہری نیچے دیے گئے ویب سائٹ لنک پر کلک کر کے ووٹ ڈال سکتے ہیں۔

https://participa.barcelonaencomu.cat/ca

Read More

نیمار اور بارسلونا فٹبال کلب مقدمہ کا سامانا کریں گے

May 5, 2017

بس پریس۔کام/سعد تارڑ۔ سپین کی ایک عدالت نے فٹبال سٹار کھلاڑی نیمار، بارسلونا فٹ بال کلب اور اس کے دو سابق صدور روسیئع اور بورتامیو کے خلاف عدالتی تحقیقات کا آغاز کرنے کا حکم جاری کر دیا ہے۔ بارسا کلب اور نیمار پر 34 لاکھ یورو کے فراڈ اور کاروبار میں بدعنوانی کا مقدمہ قائم کیا جائے گا۔ وہیں عدالت نے ان تمام سے مشترکہ طور پر 34 لاکھ یورو بطور زر ضمانت بھی طلب کیا ہے۔ سپین کے سرکاری استغاثہ نے نیمار کیلئے 2 سال جیل اور 1 کروڑ یورو جرمانہ اور بارسا کلب کیلئے 84 لاکھ یورو جرمانہ کی سزا کا مطالبہ کیا ہے۔/ٹونی البیر۔ایفی 

Read More

فیملی سسٹم کی تباہی، سپین کے٪17 ‘سنگل والدین’ گھروں کا کرایہ ادا کرنے سے قاصر

May 5, 2017

بس پریس۔کام/سعد تارڑ۔ میڈریڈ کی شہری اور صوبائی حکومت نے 2011 سے 2013 کے دوران سوشل سروس کے تحت 4.800 گھروں کی فروخت کی تھی۔ اور فروخت کے وقت اس بات کا یقین دلایا تھا کہ، ان گھروں کے خریداروں کو مالی حالات خراب ہونے کے باوجود گھروں سے بیدخل نہیں کیا جائے گا۔ لیکن ایسا نہیں ہو پایا۔ اور بہت سے مالکان اقساط کی عدم ادائیگی کے باعث گھروں سے بیدخل کیے گئے۔ ایمنسٹی انٹرنیشنل کی جانب سے سپین کے مالی بحران اور گھروں سے بیدخلی کے عنوان سے ایک رپورٹ شائع کی گئی ہے۔ جس کے مطابق 2016؁  میں جن خاندانوں سے اقساط کی عدم ادائیگی کے باعث گھروں کو خالی کروایا گیا۔ ان میں سے ٪17.3 'سنگل والدین' ہیں۔ رپورٹ کے مطابق 2016 میں 34.193 کرایہ داروں کو کرایہ کی عدم ادائیگی کے باعث گھروں سے بیدخل کیا گیا۔ ایمنسٹی کے مطابق سپین کی ٪22.1 آبادی غربت کا شکار ہونے کے خدشہ سے دوچار ہے۔ جبکہ ٪37.5 سنگل والدین غربت کا شکار ہونے کے خدشہ سے دوچار ہیں۔/یورپ پریس 

Read More

معاشی بہتری کیلئِے، سادگی کی پالیسی برقرار رہے گی۔ حکومت سپین

May 5, 2017

بس پریس۔کام/سعد تارڑ۔ وفاقی وزیر مالیات حکومت سپین کرستوبل مونتورو نے اپنے بیان میں کہا ہےکہ، 2017 کے دوران بھی ملک میں سادگی کی پالیسی کو برقرار رکھا جائے گا۔ اور 2017 کے بجٹ میں ایسا کوئی منصوبہ پیش نہیں کیا جائے گا۔ جس کی بناء پر ملک کا معاشی ترقی کا ہدف ٪2.5 متائثر ہو۔ وزیر مالیات کے مطابق 2017 کیلئے حکومت کے تین بڑے اہداف ہیں۔ قرضے کو ملک کی مجموعی اقتصادی پیدوار کے ٪99.6 کے برابر لانا۔ بجٹ خسارہ کو ٪3.1 تک لانا۔ اور عوامی فلاح و بہبود کے بجٹ (پینشن میں ٪3.09۔ تعلیم میں ٪1.7۔ صحت میں ٪2.3۔ اور سماجی بہبود میں ٪4.90) اضافہ۔/پاکو کامپوس۔ایفے  

Read More

سوشلسٹ پارٹی سپین: سیکرٹری جنرل انتخابات، سوزانا سب سے آگے

May 5, 2017

بس پریس۔کام۔/سعد تارڑ۔ سپین کی دوسری سب سے بڑی سیاسی جماعت سوشلسٹ پارٹی کے نئے سیکرٹری جنرل کے انتخابات کیلئے تین امیدوار میدان میں اتر آئے۔ امیدواروں میں اندلس صوبہ کی صدر سوزانا دیاز، سباق سیکرٹری جنرل و صدارتی امیدوار سپین پیدرو سانچیز اور سابق سپیکر قومی اسمبلی سپین پاچی لوپیز شامل ہیں۔ اہم پارٹی کی سربراہی سنبھالنے کیلئے اندرونی انتخابات کیلئے تمام امیدواروں کو اپنے حمایتیوں کی فہرست پارٹی الیکشن کمیشن کو جمع کروانی ہوتی ہے۔ حتمی تاریخ تک سوزانا دیاز 63.610 حمایتیوں کے ساتھ سب سے آگے ہیں۔ ان کے بعد پیدرو سانچیز 57.369 اور پاچی لوپیز 12 ہزار حمایتیوں کے ساتھ میدان میں اترے ہیں۔/20منٹ 

Read More

سپین: گھر خریدنے کیلئے 10.800 یورو کی امداد کا اعلان

May 4, 2017

بس پریس۔کام/سعد تارڑ۔ وفاقی حکومت سپین نے 2018 سے 2021 کیلئے سرکاری منصوبہ کا اعلان کر دیا ہے۔ جس کے تحت نوجوانوں کو نئے گھروں/اپارٹمنٹوں کی خرید پر 10.800 یورو تک مالی امداد دی جائے گی۔ مالی امداد وصول کرنے کیلئے عمر کی حد 35 سال رکھی گئی ہے۔ البتہ مالی امداد کی رقم، گھر کی کل قیمت کے ٪20 سے زیادہ نہیں ہوگی۔ اس امداد کا باقاعدہ اعلامیہ یکم جون 2017 کو جاری ہونے والے شاہی فرمان میں کیا جائے گا۔ جس کا اطلاق یکم جنوری 2018 سے ہو گا۔ وہیں اس منصوبہ کے تحت گھر کرایہ پر لینے کیلئے نوجوانوں کو دی جانے والی امدادی رقم 600 یورو سے بڑھا کر 900 کر دی جائے گی۔ جبکہ کم آمدنی والے اور گھروں کی اقساط نہ دے پانے کی وجہ سے گھر بینکوں کو واپس کرنے والے افراد کو بھی ماہانہ 150 یورو سے 400 یورو تک مالی امداد فراہم کی جائے گی۔  532.51 یورو، (سالانہ 14 تنخواہیں) وصول کرنے والے افراد بطور کم آمدنی والے افراد کے مالی مدد وصول کر سکیں گے۔/یورپ پریس 

Read More

سیکنڈری سکولوں میں اسلامیات کی تعلیم دی جائے۔ اسلامک کمیشن سپین کا حکومت سے مطالبہ

May 2, 2017

بس پریس۔کام/سعد تارڑ۔ اسلامک کمیشن سپین نے وفاقی حکومت اور صوبائی حکومتوں سے سیکنڈری سکولوں میں اسلامیات کی کلاسز شروع کرنے کا مطالبہ کیا ہے۔ کمیشن کے مطابق اگر 12 سے 16 سال کے طلباء کو اسلامیات کی تعلیم سکولوں میں دی جائے تو، اس سے جہاں طلباء اسلام کے حقیقی پیغام سے روشناس ہوں گے وہیں، انہیں شدت پسندی کی جانب راغب نہیں کیا جا سکے گا۔ کمیشن کے سربراہ رائے طاطاری کے مطابق علاج سے احتیاط بہتر ہے۔ اگر آپ سیکنڈری سکول کے طلباء کو انٹرنیٹ پر موجود مواد سے اسلام کی تعلیمات سے روشناسی کیلئے آزاد چھوڑیں گے۔ تو وہ ممکنہ طور پر شدت پسند گروہوں کی جانب رجوع کر سکتے ہیں۔ اسلامیات کی کلاسز کے اجراء کا مطالبہ اسلامک کمیشن کی جانب سے وزیر تعلیم اور وزیر انصاف کے ساتھ ہونے والی ایک حالیہ میٹنگ میں اٹھایا گیا تھا۔ محکمہ تعلیم سپین کے مطابق وہ اسلامک کمیشن کے سربراہ کے ساتھ ملاقات کی خواہش رکھتے ہیں۔ البتہ اگلے تعلیمی سال میں سکول مضامین میں کوئی تبدیلی نہیں آئے گی۔ اعدادوشمار کے مطابق فروری 2017 کے آغاز میں ملک میں کل 2.90.110 مسلم طلباء سکولوں میں زیر تعلیم ہیں۔ جن میں سے ٪95  تقریبا 2.75.000 طلباء کو سرکاری سکولوں میں اسلامیات کا مضمون نہیں پڑھایا جا رہا۔ اسلامک کمیشن سپین کے مطابق سکولوں میں اسلامیات کی کلاسز کے اجراء کیلئے والدین کو آگے آنا ہو گا۔ اور ہر سال فروری میں بچوں کے سکولوں میں داخلے کے وقت داخلہ فارم پر موجود خانہ میں بچوں کیلئے دین اسلام کی تعلیم کے خانہ کو کلک کرنا ہو گا۔ طاطاری کے مطابق تحریری طور پراسلامیات کی تعلیم کا باقاعدہ  مطالبہ کرنے والے طلباء کی تعداد انتہائی کم ہے۔ جس کے باعث حکام بھی اس مطالبہ کو بہت اہم ایشوء کے طور پر نہیں دیکھتے۔ اس حوالہ سے پاک فیڈریشن سپین کے صدر ثاقب طاہر کا کہنا ہے کہ، 1992؁ میں سپینش حکومت نے اسلامک کمیشن کے ساتھ ایک معاہدہ پر دستخط کیے تھے۔ جس کے تحت ابتدائی، پرائمری اور سیکنڈری سکولوں میں مسلم طلباء کو دین اسلام کی تعلیم دینے کی ضمانت فراہم کی گئی تھی۔ مسلم سوسائٹی بارسلونا کے صدر طاہر فاروق وڑائچ کے مطابق ان کی ایسوسی ایشن کلوت سینٹر کے تعاون سے اردو اور سپینش زبان میں سکولوں کے طلباء کیلئے اسلامیات کا کورس کروا رہی ہے۔ جس کے پہلے کورس کی ابتداء ہو چکی ہے۔

Read More

کام کا بوجھ۔ 5 سالوں میں سپین پولیس کے 45 سپاہیوں کی خودکشی

May 2, 2017

بس پریس۔کام/سعد تارڑ۔ حکومت سپین کے مطابق 2011 سے 2015 کے 5 سالوں کے دوران قومی پولیس کے 45 سپاہیوں نے خودکشی کی ہے۔ سب سے زیادہ خودکشی کے واقعات میڈریڈ صوبہ میں سامنے آئے ہیں۔ جہاں 13 سپاہیوں نے خودکشی کی۔ حکام کے مطابق، نفسیاتی طور پر سب سے زیادہ متائثر قومی پولیس کی خصوصی بریگیڈ کے سپاہی ہیں۔ جن کے ذمہ جلسوں، جلوسوں اور اہم سرکاری عمارتوں کی حفاظت ہوتی ہے۔ حکام نے قومی پولیس میں سپین رینجرز کے ڈیوٹی طریقہ کار کو اپنانے اور پولیس سپاہیوں کیلئے خصوصی نفسیاتی ڈاکٹروں کی تعیناتی کا مطالبہ کیا ہے۔ تاکہ لمبی ڈیوٹی کی وجہ سے تھکے ہوئے اور نفسیاتی دبائوکے شکار سپاہیوں کو بہتر ماحول مہیا کیا جاسکے۔ /ای پی

Read More

بارسلونا ایرپورٹ، 3 گھنٹے میں پاسپورٹ کنٹرول۔ مسافر پریشان

May 1, 2017

بس پریس۔کام/سعد تارڑ۔ یورپ بھر میں 7 اپریل سے لاگو ہونے والے نئے یورپی پاسپورٹ کنٹرول سسٹم کے بعد، بارسلونا ایرپورٹ پر مسافروں کو جہاز پر سوار ہونے اور بارسلونا ایرپورٹ پر جہاز کے اترنے کے بعد ایرپورٹ سے باہر نکلنے پر تین گھنٹے تک صرف ہو رہے ہیں۔ ال پریودیکو اخبار کے ایک ایرہوسٹس سے لیے گئے انٹرویو کے مطابق، اب یہ معمول بن گیا ہے کہ، ہر فلائیٹ میں بہت سے مسافر، بورڈنگ ہونے کے باوجود وقت پر جہاز تک نہیں پہنچ پاتے۔ جس کے باعث مسافروں کے انتظار میں فلائیٹ تاخیر کا شکار ہو جاتی ہے۔ نئے یورپی قانون سے قبل ایک یا دو مسافر وقت پر جہاز میں سوار ہونے کیلئے نہیں پہنچ پاتے تھے۔ جن کا انتظار بھی نہیں کیا جاتا تھا۔ جبکہ اب یہ ایک معمول بن چکا ہے۔ جس کے باعث فلائیٹیں تاخیر کا شکار ہو جاتی ہیں۔ پولیس حکام کے مطابق ایرپورٹ پر عملہ کی کمی ہے۔ جس کے باعث مسافروں کی لمبی قطاریں پاسپورٹ کنٹرول کے سامنے لگ جاتی ہیں۔ بین الاقوامی فلائیٹوں کے مسافر، اس بات کے عادی ہوتے ہیں، کہ انہیں پاسپورٹ کنٹرول پر لمبی قطاروں کا سامنا کرنا پڑے گا۔ اور یہ مسافر ذہنی طور پر تیار ہوتے ہیں۔  لیکن یورپی یونین کے ممالک میں سفر کرنے والے مسافر اس طرح وقت لگنے کے عادی نہیں ہوتے۔ پولیس حکام کے مطابق تمام عملہ اپنی جگہ پر موجود ہوتا ہے۔ لیکن مصروف اوقات میں مسافروں کا ہجوم اکٹھا ہو جاتا ہے۔ اس تمام صورتحال سے سب سے زیادہ مشکل سے دوچار لگژری گاڑیوں کے ڈرائیور ہیں۔ جن کے بقول انہیں کسی بھی مسافر کے ایرپورٹ پر فلائیٹ اترنے کے بعد ایک گھنٹہ تک انتظار کرنا ہوتا ہے۔ مسافر عمومی طور پر آدھ گھنٹہ بعد کسٹم اور پاسپورٹ کنٹرول سے فارغ ہو کر لائونج میں آ جاتے ہیں۔ موجودہ صورتحال میں مسافر ڈیڑھ سے تین گھنٹوں میں پاسپورٹ اور کسٹم کنٹرول سے فارغ ہو رہے ہیں۔ جس کے باعث انہیں شدید مشکلات کا سامنا کرنا پڑ رہا ہے۔ اخبار کے مطابق اس صورتحال میں بارسلونا شہر کی شہرت کو پہنچنے والا نقصان ناقابل تلافی ہوگا۔ محکمہ سیاحت کے اندازہ کے مطابق یکم مئی کی چھٹیوں میں سپین کے ایرپورٹوں سے پچاس لاکھ سیاحوں کے سفر کرنے کا امکان ظاہر کیا گیا ہے۔ وہیں حکام کے مطابق بارسلونا ایرپورٹ کا ڈیزائن بھی مسافروں کے پاسپورٹ کنٹرول سے جلد گذرنے کی راہ میں ایک رکاوٹ ہے۔ 

 

Read More

سپین: اپریل میں 5- درجہ حرارت، فصل جم نہ جائے۔ کھیتوں پر ہیلی کاپٹروں کی پروازیں

May 1, 2017

بس پریس۔کام/سعد تارڑ۔ زرعی ملک ہونے کے باعث سپین میں فصلوں پر بہت زیادہ محنت کی جاتی ہے۔ اپریل کے آخر میں شدید سردی کی غیر متوقع لہر کے باعث انگور کی کاشت کے علاقہ 'ریبیرا دے دوئیرو' میں درجہ حرارت منفی 5 ڈگری تک گر گیا ہے۔ جس کے باعث انگور کی فصل کو شدید نقصان پہنچنے کا خدشہ ہے۔ ماہرین محکمہ موسمیات کے مطابق صبح 2 بجے سے صبح 7 بجے تک جما دینے والی سردی پڑے گی۔ جس کے باعث انگور کے پودوں پر پھوٹنے والی کونپلیں سردی کے باعث ختم ہو جائیں گی۔ اس صورتحال میں فصل کو سردی کی شدت سے بچانے کیلئے برگالیسا وائن کمپنی نے ہیلی کاپٹروں کی خدمات حاصل کی ہیں۔ جو کہ سورج کی پہلی کرن نکلنے سے قبل، انگور کی فصلوں پر انتہائی نیچی پرواز کرتے ہوئے، کھیتوں کے اوپر موجود سرد ہوا کی دبیز لہر کو درہم برہم کریں گے۔ جس کے باعث پھوٹنے والی کونپلیں جمنے سے بچ جائیں گی۔  ماہرین زراعت کے مطابق یہ طریقہ اس سے قبل فرانس میں کامیابی سے استعمال کیا جا چکا ہے۔ سردی کی اس شدید لہر کے باعث ال بیعرزو علاقہ میں ٪70 انگور کی فصل تباہ ہونے کا خدشہ ظاہر کیا جا رہا ہے۔ کاشتکاروں کی یونین کے مطابق گالیسیا ریجن میں سردی کے باعث 1 کروڑ 63 لاکھ انگور کے پودے تباہ ہوئے ہیں۔ جس کے نتیجہ میں وائن بوتلوں کی پیداوار میں 2 کروڑ 17 لاکھ بوتلوں کی کمی واقع ہو گی۔ جس سے کسانوں کو 7 کروڑ 20 لاکھ یورو کا نقصان اٹھانا پڑے گا۔ یونین نے حکومت سے انگور کاشت کرنے کے علاقہ کو آفت زدہ قرار دینے کا مطالبہ کیا ہے۔/پاکو سانتاماریا۔ایفے

Read More

اگلیسیاس کے خلاف تحریک عدم اعتماد نہیں لائوں گا ۔ سپینش صدر کا طنز

May 1, 2017

بس پریس۔کام/سعد تارڑ۔ سپینش صدر ماریانو راخوئی نے پابلو اگلیسیاس پر طنز کرتے ہوئے کہا ہے کہ، وہ پابلو اگلیسیاس کے خلاف کوئی تحریک عدم اعتماد اسمبلی میں پیش نہیں کریں گے۔ راخوئی برسلز میں بریگزٹ کے حوالہ سے یورپی صدور کی اہم میٹنگ کے بعد صحافیوں سے بات چیت کر رہے تھے۔ پودیموس پارٹی کے رہنما پابلو اگلیسیاس نے صدر راخوئی کے خلاف تحریک عدم اعتماد پیش کرنے کا اعلان کر رکھا ہے۔ راخوئی نے مزید کہا ہے کہ، سپینش حکومت، اگلیسیاس کے اعلان کے بعد انتہائی چوکس حالت میں ہے۔ البتہ اگلیسیاس نے تحریک اسمبلی میں پیش کرنے کی بجائے اپنے پارٹی ممبران سے راِئے طلب کرنے کیلئے رجوع کرنے کا فیصلہ کیا ہے۔

Read More

سپین میں ٪25.46 تارکین وطن بیروزگار

Apr 30, 2017

بس پریس۔کام/سعد تارڑ۔ سپین تارکین وطن کیلئے ایک پسندیدہ ملک نہیں رہا۔ ادارہ شماریات سپین کے مطابق سپین میں مقیم ٪25.46 تارکین وطن بیروزگار ہیں۔ 2017 کی پہلی سہہ ماہی میں 28.600 تارکین وطن، جبکہ 11.300 سپینش باشندوں کو اپنی نوکریوں سے ہاتھ دھونے پڑے ہیں۔ وہیں 2016 کے دوران 68.723 تارکین وطن سپین میں اپنی رہائش ترک کر کے اپنے آبائی ممالک کو واپس لوٹ گئے ہیں۔ جس کے باعث سپین میں مقیم 45 لاکھ تارکین وطن، کل آبادی کے ٪9.8 حصہ کے برابر رہ گئے ہیں۔ 

Read More

نیا ٹیکس: چینی سے بنے مشروبات کتلونیا میں اس ہفتے مہنگے ہو جائیں گے

Apr 30, 2017

بس پریس۔کام/ سعد تارڑ۔ اس ہفتہ سے کتلونیا میں چینی سے بنے مشروبات کی قیمت میں اضافہ کر دیا جائے گا۔ یہ قیمت ہر اس مشروب میں کی جائے گی۔ جس میں ہر 100 ملی لیٹر میں 5 گرام چینی پائی جاتی ہے۔ کوکا کولا کین کی قیمت میں 4 سینٹ۔ کوکا کولا 2 لٹر بوتل میں 24 سینٹ۔ پیپیسی کین کی قیمت میں 4 سینٹ۔ دیا کولا کی قیمت میں 3 سینٹ۔ گرانینی اورنج جوس کی قیمت میں 18 سینٹ۔ شویپس تونیکا کی قیمت میں 4 سینٹ۔ ریڈ بل کی قیمت میں 3 سینٹ۔ کاکوءلات کی قیمت میں 14 سینٹ کا اضافہ ہو جائے گا۔ حکومت کا یہ اقدام چینی کے زیادہ استعمال سے پیدا ہونے والی بیماریوں  پر اٹھنے والے اخراجات سے نبٹنے کیلئے مزید رقم کو حصول ہے۔ وہیں حکومتی ذرائع کا خیال ہے کہ قیمت میں اس اضافہ سے عوام چینی سے بنے مشروبات کے استعمال میں کمی لے آئیں گے۔/الیساندا پونس  

Read More

۔2020 کے اختتام پر سپین میں بیروزگاری ٪11.2 رہ جائے گی

Apr 29, 2017

بس پریس۔کام/سعد تارڑ۔ حکومت سپین کے مطابق 2020؁ کے اختتام پر سپین میں بیروزگاری کی شرح کم ہو کر ٪11.2 رہ جائے گی۔ سپین حکومت کو امید ہے کہ 2020 کے اختتام پر معاشی ترقی کی رفتار یہی رہی تو ملک میں برسرروزگار شہریوں کی تعداد 2 کروڑ 5 لاکھ ہو جائے گی۔ جبکہ بجٹ خسارہ، مجموعی ملکی پیداور کے ٪0.5 کے برابر آجائے گا۔ یہ اعدادوشمار وزیر معیشت لویس غیندوس نے وفاقی کابینہ کے اجلاس کے بعد پریس کانفرنس میں جاری کیے۔ 

Read More

جلد کتلان علیحدگی ریفرنڈم کی تاریخ کا اعلان کر دیا جائے گا۔ پوئیج دے مونتے، کتلان صدر

Apr 29, 2017

بس پریس۔کام/سعد تارڑ۔ کتلان صدر پوئیج دے مونتے نے کہا ہے کہ کتلونیا کی سپین سے علیحدگی کے لئے منعقد کیے جانے والے ریفرنڈم کی تاریخ کا اعلان گرمیوں کی چھٹیوں سے قبل کر دیا جائے گا۔ صوبائی اسمبلی کے اجلاس میں ایک سوال کا جواب دیتے ہوئے انہوں نے کہا کہ، ابھی کسی تاریخ کا حتمی فیصلہ نہیں ہوا۔ اس لئے ریفرنڈم کی تاریخ کو چھپانے کی بات غلط ہے۔ اور علیحدگی پسند اتحاد کسی اتوار کے روز اس ریفرنڈم کے انعقاد میں دلچسپی رکھتا ہے۔/یورپ پریس

Read More

پارٹی کی کرپشن کے باعث راخوئی کو مستعفی ہو جانا چاہئے۔ پیدرو سانچیز، سوشلسٹ پارٹی

Apr 29, 2017

بس پریس۔کام/سعد تارڑ۔ پاپولر پارٹی کے رہنمائوں کی کرپشن کے باعث سپینش صدر ماریانو راخوئی کو اپنے عہدے سے فی الفور مستعفی ہو جانا چاہئے۔ یہ مطالبہ سوشلسٹ پارٹی کے سابق امیدوار برائے صدرات سپین پیدرو سانچیز نے ایک ریڈیو انٹرویو میں کیا۔ انہوں نے پاپولر پارٹی کے اہم رہنمائوں کے کرپشن الزامات کے تحت سزائوں کا سامنا کرنے پر، راخوئی سے اپنی ذمہ داریاں نہ نبھا سکنے پر اسمبلی میں وضاحت دینے کا مطالبہ بھی کیا۔ سانچیز پارٹی کی سیکرٹری شپ کے بھی امیدوار ہیں۔ سانچیز کے مطابق اگر وہ پارٹی سیکرٹری بن گئے تو وہ سوشلسٹ پارٹی کو بائیں بازو کی حقیقی پارٹی میں تبدیل کریں گے۔/البیرا اورقییخو۔ایفے

Read More

سپینش صدر راخوئی کے خلاف تحریک عدم اعتماد پیش کرنے کا پابلو اگلیسیاس کا اعلان

Apr 28, 2017

بس پریس۔کام/سعد تارڑ۔ پودیموس پارٹی کے رہنما پابلو اگلیسیاس کے مطابق پودیموس، سپینش صدر ماریانو راخوئی کے خلاف قومی اسمبلی میں تحریک عدم اعتماد پیش کرے گی۔ اگلیسیاس کے مطابق سیودادانا یا سوشلسٹ پارٹی، دونوں میں سے کوئی ایک اپنا امیدوار برائے صدارت میدان میں اتارے گی، تو وہ اس کی حمایت کریں گے۔ پودیموس پارٹی کی آرگنائزیشنل سیکرٹری گلوریا الیزو نے اس قرارداد کو اسمبلی میں پیش کرنے سے قبل پارٹی ورکروں سے رائے طلب کرنے کا اعلان کیا ہے۔ اگلیسیاس کے مطابق وہ کرپشن کے خلاف ہیں اور وہ راخوئی کو بطور صدر مزید برداشت کرنے کے حق میں نہیں ہیں۔  ملک میں کرپشن کے خاتمے کیلئے راخوئی حکومت کا خاتمہ ضروری ہے۔ اور راخوئی کی حکومت کو بچانے کیلئے کوئی بھی بہانہ قابل قبول نہیں ہے۔/ای ایف ای  

Read More

تیز رفتاری پر 1 ہفتہ میں سپین بھر میں 31 ہزار جرمانے

Apr 28, 2017

بس پریس۔کام/سعد تارڑ۔ محکمہ ٹریفک نے 17 سے 23 اپریل تک خصوصی مہم کے دوران سپین بھر میں 31.086 ڈرائیوروں کو تیز رفتاری پر جرمانےعائد کئے ہیں۔ رینجرز کے تعاون سے چلائی جانے والی مہم میں کل 5.81.294 گاڑیوں کی پڑتال کی گئی۔/رینجرز سپین 

Read More

یورپین پروفیشنل کارڈ، یورپ میں کام کرنا مزید آسان

Apr 26, 2017

بس پریس۔کام/سعد تارڑ۔ یورپی یونین کے رہائشی میل/فی میل نرس، فارمیسی ڈگری ہولڈرز، کوہ پیمائوں کے گائیڈز، پراپرٹی بزنس سے منسلک افراد اب زیادہ آسانی سے یورپی یونین میں نوکری کیلئے اپنے پسندیدہ یورپی ملک میں منتقل ہو سکیں گے۔ یورپین پروفیشنل کارڈ، پلاسٹک کارڈ کی بجائے ایک خط کی صورت میں جاری کیا جائے گا۔ وہیں اس کارڈ کے ذریعہ جعلی سرٹیفیکیٹ رکھنے والوں کی روک تھام بھی ہوجائے گی۔ اس کارڈ سے متعلق مزید معلومات نیچے دئے گئے لنک پر کلک سے حاصل کریں۔ شکریہ

http://www.europedirectbizkaia.org/wp-content/uploads/2016/01/tpe.pdf 

http://europa.eu/youreurope/citizens/work/professional-qualifications/european-professional-card/index_es.htm

http://ec.europa.eu/growth/tools-databases/newsroom/cf/itemdetail.cfm?item_id=8627&lang=es

Read More

پاکستانی ملبوسات بیچنے کی سزا۔ سپینش کمپنی ‘زارا’ کے سٹورز پر دھاوا بول دیا

Apr 26, 2017

بس پریس۔کام/سعد تارڑ۔ تیار شدہ ملبوسات بیچنے والی عالمی شہرت یافتہ سپینش کمپنی 'زارا' کے ممبئِی سٹور پر ہندوستانی بنیاد پرست گروہ  مہاراشٹر ناوونیرمان سینا کے ممبران نے دھاوا بول دیا۔ زارا کمپنی کے سٹور پر دھاوا بولنے کی وجہ 'میڈ ان پاکستان' ملبوسات کی فروخت بتائی گئی ہے۔ ہندوستانی بنیاد پرست گروہ کے درجنوں کارکنان ممبئی شہر کے سٹور میں موجود پاکستانی ملبوسات کو زمین پر پھنیک کر روندتے رہے۔ بنیاد پرست ہندوئوں نے زارا کمپنی سمیت دیگر سٹورز کو مزید پاکستانی ملبوسات بیچنے سے منع کر دیا ہے۔ 

Read More

مسلسل پانچویں سال سپین کی آبادی میں کمی

Apr 26, 2017

بس پریس۔کام/ سعد تارڑ۔ سپین کی آبادی یکم جنوری 2017 کے اعدادوشمار کےمطابق مسلسل پانچویں سال کمی کا شکار ہے۔ 2016؁ کے دوران ملک کی آبادی میں 147.982 افراد کی کمی واقع ہوئی ہے۔ 2016 میں آبادی میں کمی کی بنیادی وجہ 68.723 تارکین وطن کی اپنے ممالک کو واپسی بیان کی گئی ہے۔ اس کمی کے بعد سپین کی کل آبادی 4 کروڑ 65 لاکھ نفوس پر مشتمل ہے۔/فرناندیز نادیو

Read More

۔25 یورو میں تیز رفتار ٹرین کی ٹکٹ۔ 12 گھنٹوں میں 25 ہزار ٹکٹوں کی فروخت

Apr 26, 2017

بس پریس۔کام/سعد تارڑ۔ سپین میں تیز رفتار ٹرین کی خدمات کے 25 سال مکمل ہونے پر رینفے کمپنی نے اڑھائی لاکھ ٹکٹیں 25 یورو کے عوض فروخت کرنے کا اعلان کیا ہے۔ یہ ٹکٹیں ہر ماہ کی 25 تاریخ کو 25 ہزار کی تعداد میں جاری کی جائیں گی۔ اپریل کی 25 تاریخ کو پہلی 25 ہزار ٹکٹوں کا اجراء کیا گیا۔ جس کے باعث رینفے کمپنی کی ویب سائٹ پر ہجوم رہا۔ جس کے باعث ویب سائٹ کی سروس، سست رفتار ہو گئی۔ کمپنی کے مطابق کل 4.90.000 دفعہ ٹکٹوں کی خرید کیلئے ویب سائٹ کا دورہ کیا گیا۔ جس کہ گذشتہ ہفتہ اسی دن صرف 42 ہزار دفعہ اس ویب سائٹ کا دورہ کیا گیا۔/رینفے 

Read More

سپین: نائب کو کرپشن پر سزا۔ 9 سال صوبائی صدر رہنے والی ‘آگیرے’ مستعفی

Apr 26, 2017

بس پریس۔کام/سعد تارڑ۔ نائب سمیت 12 افراد کے کرپش اسکینڈل میں سزا یافتہ  ہونے پر پاپولر پارٹی میڈریڈ کی رہنما اسپیرانزا آگیرے کا بلدیہ میڈریڈ میں سیاسی سفر اختتام پذیر ہو گیا۔ آگیرے اس سے قبل میڈریڈ کی صوبائی صدر کے عہدے پر 2003 سے 2012 کے دوران ذمہ داریاں نبھا چکی ہیں۔ پریس کانفرنس سے خطاب کرتے ہوئے آگیرے نے اپنے نائب کی جانب سے چینل الزیبتھ دوم سکینڈل میں ملوث ہونے پر اس کو خود سے دھوکہ سے تشبیہہ دی۔ اور اپنے نائب کی کرپشن کی روک تھام نہ کرپانے پر اس کی ذمہ داری محسوس کرتے ہوئے میڈریڈ بلدیہ میں بطور کونسلر اور سربراہ بلدیاتی گروپ مستعفی ہونے کا اعلان کیا۔/کیکو ہوئیسکا۔ ای ایف ای  

Read More

اکتوبر 15 تا دسمبر 16، سپینش شہریت کیلئے تارکین وطن نے 5 کروڑ یورو ادا کردئے

Apr 25, 2017

بس پریس۔کام/سعد تارڑ۔ سپین میں مقیم تارکین وطن سپینش شہریت کے حصول کیلئے اکتوبر 2015 سے لیکر دسمبر 2016 تک 3 کروڑ 10 لاکھ یورو وزارت انصاف کو ادا کر چکے ہیں۔ انسٹیٹیوٹ سروانتے شہریت اور زبان کے کورس کیلئے اب تک 2 کروڑ یورو بطور فیس تارکین وطن سے وصول کر چکا ہے۔ یہ اعدادوشمار وزارت انصاف میں دائر ہونے والی درخواستوں اور سروانتے میں امتحان دینے والے تارکین وطن کی تعداد کی بنیاد پر نکالی گئی ہیں۔ جبکہ اپنے ممالک میں کاغذات کی تیاری پر اٹھنے والے اخراجات، سپین میں ترجمہ کے عمل کے دوران کے اٹھنے والے اخراجات الگ ہیں۔ اس کے باوجود شہریت کے حصول کا عمل سست روی کا شکار ہے۔ 2016؁ کے دوران 1.04.979 تارکین وطن نے سپینش ثقافت کا امتحان دیا تھا۔ جس میں سے 86.516 کامیاب ٹھہرے۔ جبکہ زبان کا امتحان 27.236 تارکین وطن نے دیا۔ جن میں سے 18.707 کامیاب ٹھہرے ہیں۔ سپینش ثقافت کیلئے تارکین وطن 85 یورو جبکہ زبان کیلئے 124 یورو ادا کرتے ہیں۔ صرف 2016 کے دوران انسٹیٹیوٹ سروانتے نے ثقافت کے امتحان سے 89.23.215 یورو اور زبان کے امتحان سے  27.23.600 یورو کمائے۔ جو کل 1 کروڑ 16 لاکھ 46 ہزار 815 یورو ہیں۔ 

Read More

سپین 2016 کے بجٹ خسارہ میں یورپ میں پہلے نمبر پر

Apr 25, 2017

بس پریس۔کام/سعد تارڑ۔ یورپین ایجنسی یوروسٹاٹ کے یورپی ممالک کی معیشت سے متعلق جاری کردہ اعدادوشمار کے مطابق 2016؁ کے دوران سپین بجٹ خسارہ کے لحاظ سے یورپ میں پہلے نمبر پر رہا۔ 2016 کے اختتام پر سپین کا بجٹ خسارہ، مجموعی اقتصادی پیداوار کے 4.5 فیصد کے برابر تھا۔ سپین کو 2016 کے اختتام پر بجٹ خسارہ ٪3 کرنے کا ہدف دیا گیا تھا۔ جسے بعد ازاں بڑھا کر ٪4.6 کر دیا گیا تھا۔ سپین میں مالی بحران کے دوران 2013 میں بجٹ خسارہ ٪7 رہا تھا۔  سپین کے بعد فرانس ٪3.4۔ رومانیہ اور برطانیہ میں بجٹ خسارہ ٪3 رہا۔ البتہ قرض کے لحاظ سے سپین یورپ میں نسبتا بہتر، چھٹے نمبر پر ہے۔ جہاں قرض کا حجم، مجموعی اقتصادی پیداوار کے مقابلہ میں ٪99.4 ہے۔ جبکہ یہی شرح یونان میں ٪179، اٹلی میں ٪132.6، پرتگال میں ٪130.4، قبرص میں ٪107.8، بلجیئم میں ٪105.9 ہے۔/فرانسسکو لینور 

Read More

سپین۔ گاڑیوں کے استعمال شدہ سپیئر پارٹس کی خرید و فروخت غیر قانونی قرار

Apr 25, 2017

بس پریس۔کام/سعد تارڑ۔ گاڑیوں کی دنیا میں استعمال شدہ سپیئر پارٹس کی خرید و فروخت ایک معمول کا عمل ہے۔ لیکن سپین میں منظور ہونے والے آرڈیننس 20/2017 کے تحت استعمال شدہ سپیئر پارٹس کی خرید و فروخت غیر قانونی قرار دے دی گئی ہے۔ اگر اس کی فروخت 'کات' centro autorizado para el tratamiento. کے علاوہ کی گئی ہو۔ اس قانون کے بعد کوئی بھی فرد یا ادارہ یا انٹرنیٹ پر موجود ویب سائٹس جو کہ 'کات' سرٹیفیکیٹ کے حامل نہیں ہیں، استعمال شدہ سپیئِر پارٹس کی خرید و فروخت نہیں کرسکیں گے۔/موٹر

Read More

پولیتھین (پلاسٹک بیگ) کھانے والے کیڑے کی سپین میں دریافت

Apr 25, 2017

بس پریس۔کام/سعد تارڑ۔ سپین میں شہد کی مکھیوں کے چھتوں میں پائے جانے والے کیڑے کے بارے میں سائنسی تحقیق کے اعلی سپینش ادارے کے ماہرین نے انکشاف کیا ہے کہ، یہ کیڑے پولیتھین (پلاسٹک بیگ) کو کھانے کی غیر معمولی صلاحیت رکھتے ہیں۔ یہ کیڑے موم کے کیڑے کے نام سے جانے جاتے ہیں۔ ماہرین کے مطابق تجربات میں موم کے کیڑوں کو پلاسٹک بیگ پر رکھا گیا۔ تو 40 منٹ بعد پلاسٹک بیگ میں سوراخ بن گیا تھا۔ اور 12 منٹ بعد کیڑے پلاسٹک کا ایک بڑا حصہ کھا چکے تھے۔ تحقیق کے مطابق 100 موم کے کیڑے 12 گھنٹوں میں 92 ملی گرام پولیتھین کھانے کی صلاحیت رکھتے ہیں۔ پولیتھین یورپ میں پلاسٹک کی طلب کے٪40 فیصد حصہ فراہم کرتا ہے۔ جس کا سب سے زیادہ استعمال سپر مارکیٹس میں استعمال ہونے والے پلاسٹک بیگ میں کیا جاتا ہے۔ پتلے پلاسٹک بیگ ختم ہونے میں 100 سال اور موٹے پلاسٹک بیگوں کے مکمل ختم ہونے میں 400 سال کا عرصہ لگ جاتا ہے۔ کیمیائی طریقہ سے پولیتھین کو مکمل ختم کرنے کا مرحلہ کئی مہینوں پر مشتمل ہوتا ہے۔ اور اس  عمل میں نائٹرک ایسڈ کا استعمال کیا جاتا ہے۔ یہ پہلی دفعہ ہے کہ ماہرین نے نباتات سے پولیتھین کو ختم کرنے کا طریقہ دریافت کیا ہے۔/سی ایس آئی سی 

Read More

بارسلونا اور میڈریڈ فٹبال میچ۔ سبادل میں جھگڑا۔ 3 زخمی

Apr 25, 2017

بس پریس۔کام/سعد تارڑ۔ بارسلونا اور ریال میڈریڈ فٹ بال کلبوں کے درمیان ہونے والے کلاسیک فٹ بال میچ کے اختتام پر بارسلونا کے نواحی قصبہ سبادل میں جھگڑے کے نتیجہ میں 3 افراد زخمی ہو گئے۔ جھگڑا رات 23:21 پر شروع ہوا۔ جس میں 20 کے قریب افراد نے حصہ لیا۔ جھگڑے کا مرکز جیرونیس اور سیگارا گلیوں کے سنگم پر واقع ایک بار تھی۔ جہاں پر دونوں ٹیموں کے تماشائی میچ دیکھ  رہے تھے۔ میچ کے آخری لمحات میں میسی کے گول نے بارسلونا کلب کو جیت سے ہمکنار کیا تھا۔ جس پر بار میں موجود تماشائی آپے سے باہر ہو گئے تھے۔ مقامی پولیس نے موقع پر پہنچ کر حالات کو قابو میں کیا۔/گیتریس

Read More

قومی اسمبلی سپین۔ اندھے اور بہرے افراد کی شادی کے قانون میں تبدیلی

Apr 25, 2017

بس پریس۔کام/سعد تارڑ۔ قومی اسمبلی سپین اندھے اور بہرے افراد کی شادی کے قانون میں آج تبدیلی کر دے گی۔ اس تبدیلی کے بعد یہ افراد رجسٹر سول کے دفتر میں شادی کے وقت ڈاکٹری رپورٹ سے مستثنی ہوں گے۔ الی کہ کوئی انتہائی خصوصی معاملہ زیرنظر ہو۔ قانون میں یہ تبدیلی پاپولر پارٹی کی جانب سے پیش کی جائے گی۔ جسے تمام سیاسی پارٹیوں کی حمایت حاصل ہو گی۔ اس سے قبل اندھے اور بہرے سپینش شہریوں سے شادی کے وقت ڈاکٹری رپورٹ طلب کی جاتی تھی۔/یورپ پریس

Read More

سپین میں آج 25 اپریل سے سردی کی نئی لہر کا آغاز

Apr 25, 2017

بس پریس۔کام/سعد تارڑ۔ جزائر کناریا کے علاوہ سپین بھر میں آج 25 اپریل کی شام سے سرد موسم لوٹ آئے گا۔ سردی کی اس نئی لہر سے ملک بھر کے مختلف علاقوں میں درجہ حرارت میں 5 سے 15 ڈگری کی کمی واقع ہو گی۔ وہیں ملک کے شمالی علاقوں میں 700 میٹر سے بلند پہاڑوں پر برف باری کا امکان ظاہر کیا گیا ہے۔ محکمہ موسمیات کی پیشین گوئی کے مطابق سردی کی یہ لہر 27 اپریل تک جاری رہے گی۔ اور 28 اپریل سے درجہ حرارت میں کمی واقع ہونا شروع ہوجائے گی۔/خورخے زپاتا۔ای ایف ای

Read More

پیر 24 اپریل، بارسلونا میٹرو کے ملازمین ہڑتال پر

Apr 24, 2017

بس پریس۔کام/ سعد تارڑ۔ بارسلونا میٹرو سروس کے ملازمین پیر 24 اپریل کو اپنے مطالبات کے حق میں ہڑتال کریں گے۔ ہڑتال کی وجہ ملازمین کی جانب سے تنخواہوں کو ری شیڈیول کرنے کا مطالبہ ہے۔ ہڑتال کے باعث صبح 7 سے9۔ شام 4 سے 6۔ اور رات 8:30 سے 10:30 تک میٹرو کی سروس، اپنی استعداد کے ٪40 تک محدود رہے گی۔/ال پریودیکو

Read More

کتاب، پھول اور ثقافت، کتلونیا کی پہچان ہیں۔ پوئیج دے مونتے کتلان صدر

Apr 24, 2017

بس پریس۔کام/سعد تارڑ۔ سانت جوردی کے دن کے موقع پر کتلنا صدر پوئیج دے مونتے نے اپنے پیغام میں کتاب، پھول اور ثقافت کو کتلونیا کی پہچان قرار دیا ہے۔ انہوں نے کتلونیا کی آزادی کے حوالہ سے کہا کہ ریفرنڈم کا انعقاد ہو گا۔ اور اس کے انعقاد کے بغیر ہم اپنے گھروں کو نہیں لوٹیں گے۔ ریفرنڈم کے انعقاد کیلئے انہوں نے کتلان باشندوں میں اتحاد کی ضرورت پر ذور دیا۔/20 منٹ

Read More

سپین 2014 میں دائر شہریت کی درخواست کو 2017 میں فائل نمبر جاری کر دیا گیا

Apr 23, 2017

بس پریس۔کام/سعد تارڑ۔ سپین میں شہریت کی درخواستوں پر عمل درآمد کے مراحل انتہائی سست روی کا شکار ہیں۔ جس کی ایک مثال ایک ایسی درخواست کی ہے۔ جو کہ مئی 2014 میں دائر کی گئی۔ اس درخواست کو جنوری 2015 میں وزارت انصاف میں بھیجا گیا۔ جہاں اسے سکین کر کے کمپیوٹر میں محفوظ کیا گیا اور اس پر فائل نمبر 20 اپریل 2017 کو جاری کیا گیا۔ 

Read More

یورپ: 26.300 پاکستانیوں نے2015 کے دوران شہریت حاصل کر لی

Apr 23, 2017

بس پریس۔کام/سعد تارڑ۔ یورو سٹاٹ ایجنسی کی جانب سے 2015؁ کے جاری کردہ اعدادوشمار کے مطابق سپین میں 2015 کے دوران 1.14.351 افراد نے سپینش شہریت حاصل کی ہے۔ نئی شہریت دینے کے معاملہ میں سپین سے بہتر درجہ پر اٹلی اور برطانیہ فائز رہے۔ اٹلی نے 1.78.035 تارکین وطن اور اور برطانیہ نے 1.18.000 تارکین وطن کو اپنے ممالک کی شہریت دی۔ ان تین ممالک کے علاوہ فرانس میں 1.13.600 اور جرمنی میں 1.10.100 تارکین وطن نے شہریت حاصل کی۔ سپین میں شہریت حاصل کرنے والوں میں ٪21.2 مراکشی تارکین وطن۔ ٪12.2 ایکوادور، ٪10.4 کولمبین تارکین وطن رہے۔ یورپ بھر کی سطح پر 2015 کے دوران 86.100 مراکشی، 48.400 البانوی، 35 ہزار ترک، 31 ہزار ہندوستانی، 28.400 رومانین اور 26.300 پاکستانیوں نے شہریت حاصل کی۔ 

Read More

کتلونیا کی سپین سے علیحدگی کیلئے ریفرنڈم کا انعقاد۔ کتلان صدر نے قرارداد پر دستخط کر دیے

Apr 22, 2017

بس پریس۔کام/سعد تارڑ۔ کتلان حکومت نے کتلان آزادی پر منڈلاتے شکوک کے بادل ختم کرنے کیلئے مشترکہ طور پر ایک قرارداد پر دستخط کر دیے ہیں۔ سادہ اور پروقار تقریب صوبائی حکومت کے صدر دفتر کے لان میں منعقد ہوئی۔ قرارداد کے مطابق، کتلان حکومت، سپین سے علیحدگی اور نئے آزاد ملک کے قیام کیلئے ایک ریفرنڈم کی تیاری، اہتمام اور انعقاد کرے گی۔ اور اس ریفرنڈم کی ذمہ وار تمام حکومت ہو گی۔ قرارداد پر کتلان صدر پوئیج دے مونتے، نائب صدر جونکیرا اور دیگر اہم حکومتی ارکان نے دستخط کیے ہیں۔ کتلان حکومتی ذرائع کے مطابق یہ قرارداد، کتلان حکومت کی ریفرنڈم کے انعقاد سے متعلق سنجیدگی کو ظاہر کرتی ہے۔/اے سی این 

Read More

سپین آبے ٹرین: ہر ماہ کی 25 کو 25 یورو میں ٹکٹ۔ سفر جس مرضی شہر کا

Apr 22, 2017

بس پریس۔کام۔ سعد تارڑ۔ سپین کی تیز رفتار ٹرین کمپنی آبے، 25 یورو مالیت کی اڑھائی لاکھ ٹکٹیں برائے فروخت پیش کرے گی۔ اس بات کا اعلان سپینش صدر ماریانو راخوئی نے آبے ٹرین کی سروس کے 25 سال مکمل ہونے پر منعقدہ تقریب سے خطاب کرتے ہوا کیا۔ اپنے آغاز سے اب تک 35 کروڑ 70 لاکھ مسافر آبے ٹرین کے ذریعہ سفر کر چکے ہیں۔ اور اس ٹرین کی بدولت سفر میں صرف ہونے والے وقت میں ٪50 کمی واقع ہوئی ہے۔ 25 یورو کی ٹکٹ خریدنے کے خواہشمند مسافر ہر ماہ کی 25 تاریخ کو بذریعہ ویب سائٹ رینفے کمپنی ان ٹکٹوں کو خرید سکیں گے۔ رینفے کمپنی ہر ماہ 25 ہزار ٹکٹیں جاری کیا کرے گی۔ جو کہ سپین کے مختلف شہروں کے درمیان سفر کیلئے ہوں گی۔ت۔آبے

Read More

کرپشن پر میڈریڈ کے سابق صوبائی صدر کو جیل کی سزا

Apr 22, 2017

بس پریس۔کام۔سعد تارڑ۔  سپین کے صوبہ میڈریڈ کے سابق صدر اگناسیو گونزالیز کو الیزابیتھ دوم چینل کرپشن سکینڈل میں الزامات ثابت ہونے پر جیل کی سزا سنا دی گئی ہے۔ گونزالیز نے چینل الیزابیتھ دوم کمپنی کی سربراہی کے دوران لاطینی امریکہ میں مختلف کاروباری اداروں کی خریداری کے وقت ان کی مارکیٹ سے زائد قیمت کی ادائیگی ظاہر کی۔ اور اصل قیمت اور قیمت خرید میں فرق کو مالیاتی جنتوں میں واقع بینک اکائونٹس میں جمع کروایا گیا۔ سب سے مہنگا سودا، برازیل کے ایمیسو کمپنی کی خریداری ٹھہرا۔ جس کی خریداری کے عوض 2 کروڑ 14 لاکھ یورو ادا کیے گئے۔ جبکہ اس کمپنی کی حقیقی قیمت صرف 50 لاکھ یورو تھی۔ ایسے ہی مزید سودوں میں بھاری منافع کما کر سرکاری خزانہ کو نقصان پہنچایا گیا۔ اگناسیو کے پیسے کمانے کے اس طریقہ کی نشاندہی پاپولر پارٹی کے سابق خزانچی بارسیناز اور لاپوئیرتا نے کی تھی۔

Read More

سپریم کورٹ سپین نے گجرات کی خاتون کو حق دلوا دیا

Apr 21, 2017

بس پریس.کام. سعد تارڑ. فیملی کو سپین بلانے کیلئے سپین میں دائر کاغذات کو حکومت کی جانب سے درست قرار دئے جانے کے بعد ان کاغذات کو سپینش سفارت خانوں اور قونصل خانوں کی جانب سے غلط قرار نہیں دیا جاسکتا. نہ ہی اس بنیاد پر فیملی ویزا مسترد کیا جا سکتا ہے. یہ بات سپریم کورٹ سپین نے سپین کے اسلام آباد سفارتخانہ کی جانب سے ایک فیملی ویزہ کی درخواست مسترد کیے جانے کے فیصلہ کے خلاف دائر درخواست میں قرار دی ہے.

سپین میں مقیم جناب انتونیو کی جانب سے فیملی سپین بلانے کیلئے دائر درخواست آلابا ڈویژن میں قائم وفاقی وزارت ایمیگریشن کے سب آفس نے منظور کی تھی. بعد ازاں جب ان منظور شدہ اور تصدیق شدہ کاغذات کو اسلام آباد میں سپینش سفارت خانہ میں جمع کروایا گیا تو، سفارتت خانہ نے مقامی لاء فرم کی رپورٹ پر نکاح نامہ اور بچوں کے برتھ سرٹیفیکیٹ پر اعتراضات اٹھاتے ہوئے ان کاغذات کو جعلی قرار دیا اور ویزا درخواست کو نامنظور کر دیا.

جس پر درخواست دہندہ محترمہ فلورینسیا نے سپریم کورٹ سپین سے رجوع کر لیا. جس کا سپریم کورٹ میں مقدمہ نمبر 8/3839/2015 تھا۔ جو 6 نومبر 2015 کو دائر کیا گیا۔ مقدمہ کے مطابق 18 فروری 2014 کو محترمہ فلورینسیا نے فیملی بلانے کیلئے سپینش سفارتخانہ میں تمام تصدیق شدہ کاغذات بمعہ درخواست جمع کروائے. جنہیں سفارت خانہ کی جانب سے ناقابل اعتبار کاغذات قرار دے کر ویزا جاری کرنے سے انکار کر دیا گیا.

سفارتخانہ اسلام آباد کیلئے کام کرنے والے ادارے رمدے لاء ایسوسی ایٹس نے فلورینسیا کی جانب سے پیش کیے گئے کاغذات کی تصدیق کے بعد رپورٹ دی تھی کہ، پیش کیا جانے والا نکاح نامہ شکوک و شبہات پیدا کرتا ہے. رمدے ایسوسی ایٹس نے البتہ، اس بات کا اقرار کیا تھا کہ، درخواست دہندہ کی جانب سے فراہم کردہ تمام اندراجات درست ہیں اور کمپیوٹرائزڈ نکاح سرٹیفیکیٹ بھی درست ہے. لیکن ہاتھ سے لکھے گئے ابتدائی نکاح نامہ میں غلطیاں موجود ہیں. جو کہ تمام عمل کو مشکوک بناتی ہیں. اور اس نکاح نامے کو پاکستان میں مروجہ سسٹم کے مطابق تحریر اور رجسٹر نہیں کیا گیا۔  وہیں فلورینسیا اور ان کے شوہر انتونیو کی جانب سے پیش کردہ بچوں کے برتھ سرٹیفیکیٹ بھی مستند معلوم نہیں ہوتے. اور ان کا رجسٹر میں اندراج غلط طریقہ سے کیا گیا ہے. اور اس جوڑے کا نکاح بنظر غائر رائج طریقہ سے ہٹ کر کیا گیا ہے. اور ان کا ابتدائی نکاح نامہ جعلی ہے. اور اس کی تصدیق پاکستانی عدالت سے کروایا جانا ضروری ہے.

محترمہ انتونیا کی جانب سے سپریم کورٹ میں یونین کونسل ڈوگہ ضلع گجرات کے سیکرٹری کا بیان حلفی جمع کروایا گیا تھا. کہ یہ نکاح نامہ درست ہے. اور جعلی نہیں ہے. نہ ہی اس میں کوئی ہیر پھیر کی گئی ہے. وہیں فلورینسیا نے یہ نکتہ بھی اٹھایا کہ محلہ داروں کی جانب سے ہمارے نکاح کی تصدیق اور ہمارے بچوں کی تصدیق کے باوجود، محلہ داروں کی گواہی کو نظر انداز کیا گیا. اور جب ایک دفعہ سپینش حکومت ان کاغذات کو درست قرار دے چکی ہے، تو سفارت خانہ انہیں کیسے غلط قرار دے سکتا ہے.

سپریم کورٹ نے محترمہ فلورینسیا کے نکات کو وزنی قرار دیتے ہوئے، انہیں فیملی ویزا جاری کرنے کا حکم دیا ہے. اس سے قبل فلورینسیا کی میڈریڈ کی عدالت میں دائر کی گئی درخواست کو مسترد کر دیا گیا تھا. جس پر انہیں سپریم کورٹ سپین سے رجوع کرنا پڑا. پاک فیڈریشن سپین کے صدر چوہدری ثاقب طاہر نے مقدمہ جیتنے پر محترمحہ فلورینسیا اور جناب انتونیو کو مبارکباد پیش کی ہے۔ اور امید ظاہر کی ہے کہ تقسیم شدہ فیملی جلد ایک ہوسکے گی۔

Read More

بارسلونا: 23 ہزار یورو سالانہ سے کم آمدن والوں کیلئے ٹیکس چھوٹ

Apr 21, 2017

بس پریس۔کام۔ سعد تارڑ۔ ایمیگرنٹس دوست سیاسی پارٹی آئی سی وی پر مشتمل  بلدیاتی حکومت نے گھروں پر لاگو 'آئی بی آئی' ٹیکس کی مد میں ٹیکس چھوٹ کی شرح ٪50 سے بڑھا کر ٪75 کر دی ہے۔ اس طرح کم آمدن کے حامل خاندان  200 یورو تک ٹیکس چھوٹ حاصل کرسکیں گے۔ سابق امیدوار قومی اسمبلی سپین و پاک فیڈریشن سپین کے جنرل سیکرٹری راجہ بابر ناصر کے مطابق، 2017؁ کیلئے اس ٹیکس چھوٹ کا اعلان اس جمعرات کو کیا گیا ہے۔ چار افراد پر مشتمل خاندان کی صورت  میں ٹیکس چھوٹ حاصل کرنے کیلئے درخواست دہندہ سمیت اس گھر میں ڈومیسائل رکھنے والے افراد کی سالانہ آمدنی کی حد بھی بڑھا کر 23.343 یورو کر دی گئی ہے۔ 2017 کیلئے ٹیکس چھوٹ کی مد میں کل 35 لاکھ یورو مختص کیے گئے ہیں۔ اور ٹیکس چھوٹ کیلئے 30 جون تک درخواست دائر کی جاسکتی ہے۔ گذشتہ سال 4.442 افراد نے ٹیکس چھوٹ کیلئے درخواست دائر کی تھی۔ جن میں سے اکثریت کا تعلق نووء باریس، سانت مارتی اور سانتس کی یونین کونسلز سے تھا۔ راجہ بابر ناصر کے مطابق مزید معلومات کیلئے بلدیہ کے گھروں سے متعلقہ دفاتر 'آفیسیناز دے بیبیئندا' سے رابطہ کیا جا سکتا ہے۔ت۔ میقیل تابیرنا

Read More

عدالت کے سامنے پیش ہوں گا۔ سپینش صدر راخوئی کا اعلان

Apr 21, 2017

بس پریس۔کام۔ سعد تارڑ۔ گرتل کرپشن سکینڈل کی سماعت کرنے والی عدالت نے سپین کے صدر ماریانو راخوئی کو بطور گواہ طلب کر لیا ہے۔ جس پر سپینش صدر ماریانو راخوئی نے اعلان کیا ہے کہ، وہ عدالت میں بخوشی پیش ہوں گے۔ اور ان کا عدالت میں پیش ہونا ایک معمول کی کاروائی ہے۔ عدالت گرتل کرپشن سکینڈل کے 1999 سے 2005 کے واقعات کی تحقیقات کر رہی ہے۔ اس عرصہ کے دوران راخوئی حکمران پاپولر پارٹی کے سیکرٹری جنرل رہے۔ اور بعض الیکشن مہمات میں بطور ڈائیریکٹر اپنی خدمات سر انجام دیں۔ جس کی بناء پر عدالت نے صدر سپین کو بطور گواہ عدالت میں پیش ہونے کا حکم جاری کیا تھا۔ت۔خاویر لیزون۔ای ایف ای

Read More

جعلی کمپنیوں کے ذریعہ سپینش ریذیڈنس کارڈ کی تجدید سکینڈل، 188 گرفتار

Apr 21, 2017

بس پریس۔کام/سعد تارڑ۔ سپینش قومی پولیس نے جعلی کمپنیوں کے ذریعہ محکمہ سوشل سکیورٹی کے ساتھ تقریبا 60 لاکھ یورو کا فراڈ کرنے پر 188 افراد کو گرفتار کر لیا ہے۔ اس منظم جرم میں شامل افراد نے ان جعلی کمپنیوں کے ذریعہ 821 ملازمین کو نوکریاں دے رکھی تھیں۔ جنہوں نے بعد ازاں بیروزگاری الائونس کی مد میں سرکاری خزانے سے 35 لاکھ یورو وصول کیے تھے۔ 821 ملازمین میں 162 تارکین وطن بھی شامل تھے کہ جنہوں نے اپنے ریذیڈنس کارڈوں کی تجدید کروانے کیلئے ان جعلی کمپنیوں کے نوکری کے معاہدے حکومت کو پیش کر کے اپنے اقامت ناموں کی تجدید کروائی۔ اس گروہ کے خلاف تحقیقات کا آغاز بارسلونا سے ہوا تھا۔ جہاں 66 افراد کو گرفتار کیا گیا ہے۔ت۔یورپ پریس 

Read More

سپین: ایمیگریشن میں “مدد” فراہم کرنے پر سرکاری افسرکو چھ ماہ قید کی سزا

Apr 20, 2017

بس پریس۔کام/ سعد تارڑ۔ رامون نامی سپینش سرکاری افسر نے 11 سال طویل مقدمہ کے بعد چھ ماہ قید کی سزا قبول کرلی ہے۔ رامون پر 2006؁ میں اوویدو اور کویوتو شہروں کے رہائشیوں پر مشتمل ایک گروہ تشکیل دینے کا الزام تھا۔ جن کی مدد سے وہ مراکش سے تارکین وطن کو گھروں کی صفائی کے معاہدہ کے تحت سپین لیکر آتا تھا۔ رامون کی ان 'کوششوں' سے مراکش کے 15 باشندے سپین کی ایمیگریشن حاصل کرنے میں  کامیاب ہوئے تھے۔ عدالت نے رامون کے اس فعل میں معاونت کرنے پر اس کی بیوی، بیٹی اور داماد کو بھی سزا سنائی ہے۔ رامون کے وکیل صفائی کے مطابق، رامون کو سزا 11 سال بعد اس وقت سنائی گئی ہے۔ جب وہ ریٹائرمنٹ کی زندگی گذار رہا ہے۔ اور اس کے خلاف مقدمہ قائم ہونے کے بعد وفاقی حکومت نے اسے سیوتا سرحد پر تارکین وطن کے مرکز کا نگران بھی مقرر کیا تھا۔ جس کا مطلب ہے کہ اس سے سرزد ہونے والی غلطی حکومت کے نزدیک بڑا جرم نہیں تھا۔ رامون کے ساتھ مزید دس افراد کو بھی تین ماہ کی جیل کی سزا سنائی گئی ہے۔ جس سے بچنے کیلئے ان افراد نے نقد رقم میں جرمانہ ادائیگی کی حامی بھری ہے۔ وہیں بعض افراد نے کسی بھی رقم کے عوض خصوصی رعائت دینے سے انکار کیا۔ البتہ انہوں نے اس بات کا اقرار کیا کہ، بعض تارکین وطن کو ریذیڈنسی کارڈ جاری کرنے کیلئے خصوصی رعائیت دینے کا مطالبہ رامون کی جانب سے کیا گیا تھا۔ اور انہوں نے انسانی ہمدردی کے تحت یہ رعائیت فراہم کی تھی۔ 

Read More

کتلونیا کے سب سے بڑے چینی مافیا گروہ کو ختم کر دیا گیا۔ 25 گرفتار

Apr 20, 2017

بس پریس۔کام/ سعد تارڑ۔ کتلان صوبائی پولیس نے ایک آپریشن کے دوران کتلونیا کے سب سے بڑے چینی مافیا گروہ 'بانگ دے فوجیان' کے 25 ممبران کو گرفتار کر کے گروہ کا خاتمہ کر دیا ہے۔ زی جیانگ چینی ریجن سے تعلق رکھنے والا یہ گروہ انسانی اسمگلنگ، چینی لڑکیوں سے جسم فروشی کا دھندہ کروانے، منشیات فروشی، بارسلونا کیسینو میں جواء کھیلنے کیلئے چینی باشندوں کو قرض کی فراہمی، جعلی کاغذات کی تیاری اور کالے دھن کو سفید کرنے میں سرگرم تھا۔ آپریشن کے دوران گروہ کے زیر نگرانی جسم فروشی کا دھندہ کرنے والی 22 چینی لڑکیوں کو بھی آزادی دلوائی گئی ہے۔ آپریشن کے دوران پولیس کے ہاتھ بھنگ کے 15 ہزار پودے، 1 کیلوگرام ایم ڈی ایم اے، کوکین، بیش قیمت گاڑیاں اور 21.15.000 ہزار یورو نقد بھی لگے ہیں۔ پولیس کے مطابق مافیا گروہ کے خلاف تحقیقات اگست 2016 میں شروع کی گئی تھیں۔ جب ایک چینی باشندے کو جواء کھیلنے کیلئے لیے جانے والے قرض کی عدم ادائیگی پر دن دھاڑے خنجر سے قتل کرنے کی کوشش کی گئی تھی۔ت۔قومی پولیس سپین 

Read More

زمین کا سورج کے گرد چکر لگانا: ٪30 سپینش باشندے لاعلم

Apr 20, 2017

بس پریس۔کام/سعد تارڑ۔ سپین کے ٪30 باشندے اس بات سے لا علم ہیں کہ زمین، سورج کے گرد ایک مدار میں گھومتی ہے۔ ٪30 باشندے اس بات سے بھی لا علم ہیں کہ، اینٹی بائیٹک دوائیاں، بیکٹیریا سے پیدا ہونے والی بیماریوں کا علاج کرتی ہیں۔ وہیں اس بات سے بھی لاعلم ہیں کہ انسان نے کبھی بھی ڈائینوسار جانوروں کے ساتھ اکٹھے زندگی نہیں گذاری۔ یہ دلچسپ اعدادوشمار 'سائنس کے بارے میں سماجی شعور' نامی سروے کے ذریعہ سامنے آئے ہیں۔ جو سرکاری فائونڈیشن برائے سائنس 'فیسیت' کے زیر نگرانی کیا گیا۔ اسی فائونڈیشن کے زیر اہتمام دو سال قبل کیے گئے سروے میں ہر چار میں سے ایک سپینش باشندے کو یقین تھا کہ سورج زمین کے گرد گھومتا ہے۔ وہیں حالیہ سروے میں  یہ بات بھی سامنے آئی ہے کہ ٪59.8 باشندے چینی طریقہ طب آکوپنچر، اور ٪52.7 باشندے ہومیوپیتھک طریقہ طب کو ایلو پیتھک طریقہ علاج سے بہتر تصور کرتے ہیں۔ ایلوپیتھک پر یقین نہ رکھنے والوں کی بڑی تعداد اعلی تعلیم یافتہ افراد پر مشتمل ہے۔ وہیں ٪84 باشندے پیشین گوئیوں اور قسمت کا حال دکھانے والوں کی صداقت پر یقین رکھتے ہیں۔ اور ٪71.3 فیصد باشندے اچھی قسمت پانے کیلئے مختلف اشیاء کو اپنے قریب رکھتے ہیں۔ت۔ ویکیپیڈیا

Read More
error: Content is protected !!